നടിയെ ആക്രമിച്ച കേസ്: നിയമ നടപടിക്കൊരുങ്ങി നടന് ദിലീപ്
കൊച്ചി: നടിയെ ആക്രമിച്ച കേസില് കോടതി കുറ്റവിമുക്തനാക്കിയതിന് പിന്നാലെ നിയമ നടപടിക്കൊരുങ്ങി നടന് ദിലീപ്. തനിക്കെതിരായ ഗൂഢാലോചനയെക്കുറിച്ച് അന്വേഷിക്കണമെന്നാണ് ആവശ്യം.
അന്വേഷണസംഘം മുഖ്യമന്ത്രിയെ ഉള്പ്പെടെ തെറ്റിധരിപ്പിച്ചുവെന്നാണ് ദിലീപിന്റെ വാദം. ഉദ്യോഗസ്ഥര് അവരുടെ നേട്ടത്തിനായി തന്നെ ബലിയാടാക്കിയെന്നുമാണ് ദിലീപ് പറയുന്നത്. ഇക്കാര്യത്തില് വിധി പകര്പ്പ് ലഭിച്ചശേഷം തുടര്നടപടി സ്വീകരിക്കാനാണ് ദിലീപിന്റെ നീക്കം.
കുടുംബ പ്രേക്ഷകരെ തന്റെ സിനിമയില് നിന്ന് അകറ്റാന് ശ്രമിച്ചു. ഗൂഢാലോചനക്കാര്ക്കെതിരെ നിയമനടപടി ആലോചിക്കുകയാണ്. കോടതി ഉത്തരവ് ലഭിച്ച ശേഷം തീരുമാനമെടുക്കും. മാധ്യമങ്ങളില് തെറ്റായ വാര്ത്ത വരുത്തി സമൂഹത്തിന്റെ ശത്രുത തനിക്ക് നേരെ സൃഷ്ടിച്ചു. എസ്ഐടി സര്ക്കാരിനെ തെറ്റിധരിപ്പിച്ചു.
ആറു പ്രതികളെ അറസ്റ്റ് ചെയ്ത ശേഷം കേസില് ഗൂഢാലോചനയില്ലെന്ന് മുഖ്യമന്ത്രി തന്നെ പറഞ്ഞതാണ്. ഇതിന് ശേഷം മുഖ്യമന്ത്രിയെ ചില ഉദ്യോഗസ്ഥര് തെറ്റിദ്ധരിപ്പിച്ചു. ഈ കാര്യങ്ങളെല്ലാം സര്ക്കാര് അന്വേഷിക്കണമെന്നും ദിലീപ് ആവശ്യപ്പെട്ടു.
നടിയെ തട്ടിക്കൊണ്ട് പോയി ബലാത്സംഗം ചെയ്ത കേസില് എട്ടാം പ്രതിയായിരുന്ന നടന് ദിലീപിനെ തിങ്കളാഴ്ചയാണ് കോടതി വെറുതെ വിട്ടത്. പള്സര് സുനി അടക്കം ആറ് പ്രതികള് കുറ്റക്കാരാണെന്നും എറണാകുളം സെഷന്സ് കോടതി കണ്ടെത്തി.
Leave A Comment