മലയാളത്തെ മാറോടണച്ച്  മോഹനോന്മുഖമാക്കി  മരണത്തിലേക്ക്  മൺമറഞ്ഞ മഹിത മുദ്രിതനാണ് കുഞ്ഞുണ്ണിമാഷ്.  ഈ പ്രിയ കവി കുട്ടിക്കവിതകളുടെ കുലപതിയായി പ്രകീർത്തിക്കപ്പെട്ട പ്രഥമ ഗണനീയനായിരുന്നു.  ഇദ്ദേഹത്തിന്റെ സത്ക്കർമ്മങ്ങൾ എന്നെന്നും സ്മർത്തവ്യങ്ങളാണ്. ഇരുൾപ്പരപ്പിലെ ഇന്ദ്രശോഭയായി ഇന്നും ആ മിഴികൾ മാനസ സരസുകളിൽ ജ്വലിക്കുന്നു.  കുഞ്ഞുണ്ണിമാഷിൻ്റെ ചരമവാർഷിക ദിനം ഓർമ്മകൾ ഉണർത്തി കടന്നു പോകുന്നു. 

വ്യവസ്ഥാപിതമായ കാവ്യ രീതികളിൽ നിന്നകന്ന് ഒരു പുത്തൻ  അവ ബോധവും ആർജവവും വിളയിച്ചെടുത്ത് വിസ്മയമായി വിരാജിച്ച വിശിഷ്ട കവിയായിരുന്നു കുഞ്ഞുണ്ണിമാഷ്.  കുട്ടികളുടെ കൂട്ടുകാരനായിരുന്നു. കുഞ്ഞുണ്ണിമാഷ് കാലയവനികയിലേക്ക് കഥാവശേഷനായി കടന്നു പോയെങ്കിലും കൈരളിയുടെ കാവ്യനഭോമണ്ഡലത്തിൽ പ്രാതസ്മരണീയനായി പ്രശോഭിക്കുന്നു. അദ്ദേഹം അനുവാചകരിൽ അദ്വിതീയവും അനുഗ്രഹീതനുമായി അഭൗമതേജസ്സറിയിച്ച അപൂർവ്വ വ്യക്തിപ്രഭാവമായിരുന്നു. കൈരളിയുടെ കവിതാസാഹിത്യ ചരിത്രത്തിൽ സമാനതകളില്ലാത്ത സവിശേഷതകളുടെ സംസ്‌കാര സമ്പന്നനായ സമുന്നത സ്ഥാനീയനാണ്.  

സംവേദനത്തിൻ്റെ അതിതീക്ഷണതയാണ് കുഞ്ഞുണ്ണിക്കവിതകളുടെ പ്രത്യേകത. കുഞ്ഞുണ്ണിക്കവിതകളെ ഒരു ബാലവൃന്ദത്തിൽ ഒതുക്കേണ്ടതില്ല. ആബാലവൃന്ദം ജനങ്ങൾക്കുമത് പ്രിയങ്കരമാകുന്നു. നാടൻ പാട്ടുകളുടെ താളവും ഈണവും വീര്യവും ഉൾക്കൊള്ളുന്ന നക്ഷത്ര ഗീതങ്ങളാണവ. 

                 ഇത്തിരിയേയുള്ളൂ ഞാൻ 

കുഞ്ഞുണ്ണിയുടെ ജീവിതത്തിലേക്കും കവിതയിലേക്കുമുള്ള വഴിയും വാതായനവുമാണീ വരികൾ. ഇത്തിരിപ്പോന്ന വാക്കുകളാൽ ഇത്തിരിപ്പോന്ന ആകാശവും നക്ഷത്രങ്ങളും സൃഷ്ടിക്കാൻ കുഞ്ഞുണ്ണിക്ക് കഴിഞ്ഞു. മൂന്നു വാക്കുകൾ കൊണ്ട് നാലാമതൊരു നക്ഷത്രം എന്ന ചൊല്ല് കുഞ്ഞുണ്ണിയുടെ കാര്യത്തിൽ അനർത്ഥമാകുന്നു.  

ആ നക്ഷത്ര ഗീതങ്ങൾ ചൊരിയുന്ന പ്രകാശ രശ്മികളിൽ ജീവിതത്തിന്റെ വലിപ്പച്ചെറുപ്പങ്ങളും ന്യായാന്യായങ്ങളും നന്മ തിന്മകളും അനാവൃതമാകുന്നു.  സ്വതന്ത്ര്യത്തിന്റെയും അച്ചടക്കത്തിന്റെയും പ്രാധാന്യം  ഉദീരണം ചെയ്യപ്പെടുന്നു. മനുഷ്യ ബോധത്തിന്റെ അടിത്തട്ടിലുള്ള ഉണ്മ ഉന്മീലനമാകുന്നു. 

ഉത്തമകവിക്ക് കാലദേശാതികൾ പ്രസക്തമല്ല. എന്തിന് കവി പോലും പ്രസക്തമല്ല.  ആയതിനാൽ കുഞ്ഞുണ്ണിക്കവിത  കാലാതീതമാകുന്നു. 

കവി കുഞ്ഞുണ്ണി 2008 മാർച്ച് 26 ന് അന്തരിച്ചു. കുഞ്ഞുണ്ണി മാഷുടെ ജീവിതം ബാല്യത്തിന്റെയും വാർധക്യത്തിന്റെയും സമ്മേളനമാണ്.  കുഞ്ഞുണ്ണിക്കവിത ഒരു കുഞ്ഞിന്റെ കൊഞ്ചലും വാർധക്യത്തിന്റെ ഉപദേശവും യൗവനത്തിന്റെ മറവിയും കൂടിച്ചേർന്നതാണ്.  അതുകൊണ്ടു തന്നെ അത് ഒരേ സമയം സ്വതന്ത്ര്യത്തിന്റെയും അച്ചടക്കത്തിന്റെയും കവിതയാണ്.  കുഞ്ഞുണ്ണിമാഷിൽ നഷ്ടമായ യൗവനമുണ്ട്.  വികാരത്തിന്റെ വായാടിത്തം യൗവനത്തിന്റെ സ്വഭാവമാണ്.  ഈ നഷ്ട യൗവനം കുഞ്ഞുണ്ണിക്കവിതക്ക് ഒരു സവിശേഷ സ്വഭാവം നൽകുന്നു.  കുഞ്ഞുണ്ണിക്കവിത എത്രത്തോളം കുറിയതാകാം അത്രത്തോളം കുറിയതാകുന്നു.  അദ്ദേഹം കേരളത്തിന്റെ ഹൈക്കു കവിയാണ്.  

കുഞ്ഞുണ്ണിക്കവിതയുടെ ദൈർഘ്യം, പദാവലി, വ്യാകരണം ഇതൊക്കെ ഒരു കവിയുടെ ജീവിത ബോധത്തിന്റെ വിളംബരങ്ങളാണ്.  അതുകൊണ്ട് ഒരു കുട്ടിയുടെ ആകാംക്ഷ, ജീവിതത്തിന്റെ അത്ഭുതം, കൗതുകം ഇതാണ് കുഞ്ഞുണ്ണിയുടെ ഒരു പകുതി. 

അത്ഭുതമില്ലങ്കിൽ കവിയില്ല.  അനുഭവത്തോടുള്ള കൂറ്,  അനുഭവത്തോടുള്ള ബന്ധം,  അനുഭവത്തിൽ നിന്നുള്ള വളർച്ച ഇവയെല്ലാം കുഞ്ഞുണ്ണിക്കവിതയുടെ മുഖ മുദ്രയാണ്. കുഞ്ഞുണ്ണിക്കവിത ഉദാസീനതയെന്നു തോന്നുന്ന ഗംഭീരതയാണ്.  കുഞ്ഞുണ്ണി മാഷും കുട്ട്യോളും. എവിടെ കുഞ്ഞുണ്ണിമാഷുണ്ടോ അവിടെ കുട്ട്യോളുമുണ്ട്. കുഞ്ഞുണ്ണിമാഷ് കുട്ടിക്കവിയാണ്. എന്നും കുട്ടിയാണ്. ആ കൃതി കൊണ്ടും കവിത കൊണ്ടും കുട്ടി.

                                   

                  ഒരു വളപ്പൊട്ടുണ്ടെൻ കൈയിൽ 

                  ഒരു മയിൽപ്പീലിയുണ്ടുള്ളിൽ 

                  വിരസനിമിഷങ്ങൾ സരസമാക്കാനിവ 

                  ധാരാളമാണെനിക്കിന്നും 

മനസ്സിൽ മയിൽപ്പീലിയും കൈയിൽ വളപ്പൊട്ടുകളും വെളിപാടുകളായിക്കിട്ടിയ കുറെ കവിതകളുമായിക്കഴിഞ്ഞിരുന്ന  മാഷുടെ വലപ്പാട്ടെ വീട് പ്രസിദ്ധമാണ്.  

മാതൃഭൂമി ആഴ്ചപ്പതിപ്പിലെ കുട്ടേട്ടൻ 

കുഞ്ഞുണ്ണി 1927 മെയ്  പത്താം തിയതി ഭൂജാതനായി. ഞായപ്പിള്ളി ഇല്ലത്ത് നീലകണ്ഠൻ മൂസ്സതും തേറമ്പിൽ നാരായണിയമ്മയുമാണ് മാതാപിതാക്കൾ.  കുഞ്ഞുണ്ണി 1946 -ൽ എസ്എസ് എൽസി പാസായി. കുറച്ചുകാലം വൈദ്യവും, ടൈപ്പ്റൈറ്റിങ്ങും പഠിച്ചു.  പിന്നീട് പാലക്കാട് ഗവണ്മെന്റ് കോളേജിലെ അധ്യാപക പരിശീലനവും കഴിഞ്ഞ് ചേളാരി യുപി സ്‌കൂളിലെയും രാമനാട്ടുകര മിഷൻ സ്‌കൂളിലെയും അധ്യാപനമുപേക്ഷിച്ച് കുഞ്ഞുണ്ണി കോഴിക്കോട് രാമകൃഷ്ണ മിഷൻ ഹൈസ്‌കൂളിലെത്തി. 

അക്കാലം തുടങ്ങി മാതൃഭൂമിയിലും മറ്റ് ആനുകാലികങ്ങളിലും കവിതകൾ പ്രസിദ്ധീകരിച്ചു.  കുഞ്ഞുണ്ണിമാഷ്, അതിയാരത്ത്, വലപ്പാട് എന്ന വിലാസം പോലെ പരിചിതമാണ് കുഞ്ഞുണ്ണിമാഷ്,  രാമകൃഷ്ണാശ്രമം, കോഴിക്കോട് എന്നതും. ജീവിതത്തിന്റെ വലിയൊരു ഭാഗം ഈ വിദ്യാലയത്തിലും ഇവിടത്തെ ആശ്രമത്തിലുമാണ് മാഷ് കഴിച്ചു കൂട്ടിയത്. കുഞ്ഞുണ്ണിക്കവിതകൾ വിരിയുന്ന മോഹന മുഹൂർത്തങ്ങൾക്ക് ഈ സ്ഥാപനവും സാക്ഷ്യം വഹിച്ചിട്ടുണ്ട്.  രാമകൃഷ്ണാശ്രമത്തിൽ എത്തിപ്പെട്ടില്ലായിരുന്നെങ്കിൽ താൻ ഈ വിധത്തിൽ ആകുമായിരുന്നില്ല എന്ന് മാഷ് തന്നെ തറപ്പിച്ച് പറഞ്ഞിട്ടുണ്ട്.  ഉറൂബ്, കക്കാട്,  അക്കിത്തം,  തിക്കൊടിയൻ, എന്നിവരുമായുള്ള കാവ്യ സൗഹൃദം, കോഴിക്കോട്ടെ റേഡിയോ സ്റ്റേഷനിലെ ബാല ലോകം പരിപാടികൾ, സ്കൂളിലെ ഇടക്കിടെയുള്ള കലാപരിപാടികൾ ഇതെല്ലാം മാഷിന്റെ കാവ്യജീവിതത്തിനു പ്രചോദനമായിരുന്നു. 

കോഴിക്കോട്ടെ രാമകൃഷ്ണാശ്രമം  സ്‌കൂളിൽ പഠിപ്പിച്ചു കൊണ്ടിരിക്കുമ്പോഴായിരുന്നു കുഞ്ഞുണ്ണിമാഷ് മാതൃഭൂമി ആഴ്ചപ്പതിപ്പിലെ കുട്ടേട്ടനാകുന്നത്. നാൽപ്പതു വർഷത്തെ അധ്യാപന ജീവിതം. ഈ കാലയളവിൽ കുഞ്ഞുണ്ണിമാഷ് പഠിപ്പിക്കുകയും അതിലേറെ പഠിക്കുകയും ചെയ്തു.  ഗുരുശിക്ഷ്യ ബന്ധത്തിന്റെ ആഴവും പരപ്പും അറിഞ്ഞതും ഈ കാലത്താണ്. മുഴുവൻ സമയവും കുട്ടികളുമായി സമയം ചെലവിടാൻ ഭാഗ്യം ലഭിച്ച തനിക്ക് അതിലപ്പുറം മറ്റൊരു സ്വർഗം കിട്ടാനില്ലെന്ന് മാഷ് ഉറച്ചു വിശ്വസിച്ചിരുന്നു. അധ്യാപക ജോലിയിൽ നിന്നും 1982 മാർച്ച് 31ന് മാഷ് വിരമിച്ചു.

മലയാളം മലയാലമായിപ്പോയ മലയാളനാട്ടിൽ പിറന്ന കുഞ്ഞുണ്ണിമാഷിനോട് ഇനിയൊരു ജന്മമുണ്ടെങ്കിൽ അതെവിടെ എങ്ങനെയാവണമെന്ന് ആരോ ചോദിക്കുകയുണ്ടായി.  "ഇനിയൊരു ജന്മമുണ്ടെങ്കിൽ അത് ഇന്ത്യയിൽ തന്നെയാവണം, അതും ഈ കൊച്ചു കേരളത്തിൽ.  കൊടുക്കുന്നതിൽ പാതിയുടെ പാതി മാത്രം തരുന്ന പഞ്ചാരമണലിൽ ഇതിനേക്കാൾ കുറച്ച് വാക്കുകൾ കൊണ്ട് ഇതിനേക്കാൾ ചെറിയ കവിത എഴുതുന്നവനായി ജനിക്കണം." അതാണ് മോഹമെന്ന് ഉത്തരം നൽകി .  

നാടൻപാട്ടുകൾ ശരിയായ രീതിയിൽ ഉൾക്കൊള്ളുകയും ആസ്വദിക്കുകയും ചെയ്തില്ലായിരുന്നുവെങ്കിൽ കുഞ്ഞുണ്ണിമാഷിന് തന്റേതെന്നു മാത്രം അവകാശപ്പെടാൻ കഴിയുന്ന കവിതകളിൽ എത്തിച്ചേരാൻ കഴിയുമായിരുന്നില്ല.  ഈ തനിമയാണ് കുഞ്ഞുണ്ണിക്കവിതയിലെ തനിമയും ശുദ്ധിയും ശക്തിയും. അടക്കം,  ഒതുക്കം,  പിരി മുറുക്കം, ധ്വനി തുടങ്ങിയ ഗുണങ്ങൾക്കെല്ലാം തന്റെ കവിത പഴഞ്ചൊല്ലുകളോടാണ് കടപ്പെട്ടിരിക്കുന്നതെന്ന് മാഷ് പറയുന്നു. 

പതിനായിരത്തോളം പഴഞ്ചൊല്ലുകൾ ശേഖരിക്കുകയും അത് സ്വന്തമായി കൈകൊണ്ടു പകർത്തി എഴുതുകയും ജീവിതത്തിൽ പലവട്ടം മാഷ് ചെയ്തിട്ടുണ്ട്.  നാടൻ പാട്ടുകളുടെ ഈണവും വായ്ത്താരിയും പഴഞ്ചൊല്ലുകളുടെയും കടം കഥകളുടെയും തനതു സ്വഭാവവും ചേർന്ന് പഴമയുടെ പാരമ്പര്യവും സത്വവും ഉൾക്കൊണ്ട ഇന്നത്തെ 

കാലത്തിന്റെയും വരും കാലത്തിന്റെയും ഈരടികളാണ് കുഞ്ഞുണ്ണിക്കവിതകൾ. കാലവും ലോകവും മാറിയും മറഞ്ഞും കൂടിച്ചേർന്നും കൂടിക്കുഴഞ്ഞും കുഞ്ഞുണ്ണൂക്കവിതകളിൽ പ്രത്യക്ഷപ്പെടുന്നു. 

തന്നിൽ നിന്നും ലോകത്തിലേക്കുള്ള ദൂരവും ലോകത്തിൽ നിന്നും തന്നിലേക്കുള്ള ദൂരവും കവി അളക്കുന്നു. ഞാൻ എന്നത് ആരുടെ തോന്നലാണ്? കുഞ്ഞുണ്ണിമാഷ് പല സദസ്സുകളിലും ചോദിച്ചിരുന്ന ചോദ്യമാണ്.  കുഞ്ഞുണ്ണി എന്ന കവിക്ക് ചുറ്റുപാടുമായി ഇഴുകിച്ചേർന്ന ഒരു ബന്ധമുണ്ട്.  കവിതയിലൂടെയും ജീവിതത്തിലൂടെയും ചുറ്റുപാടുമായുള്ള ബന്ധം സുശക്തമായി കാത്ത് സൂക്ഷിക്കാൻ കുഞ്ഞുണ്ണി എന്ന മനുഷ്യന് സാധിച്ചു. 

കുമാരനാശാനെയും വള്ളത്തോളിനെയും ജി ശങ്കരക്കുറുപ്പിനെയും ആദ്യകാലത്ത് അനുകരിച്ചിരുന്നു എന്ന് മാഷ് തന്നെ പറയുന്നുണ്ട്.  പ്രാചീന കവിത്രയമായ ചെറുശ്ശേരിയെയും തുഞ്ചനെയും കുഞ്ചനെയും തൻ്റെ വിദ്യഭ്യാസ കാല കവികളായാണ് കുഞ്ഞുണ്ണി മാഷ് കണ്ടത്.  ആധുനിക കവിത്രയം തുഞ്ചനും കുഞ്ചനും ചെറുശ്ശേരിയും വെണ്മണിക്കവികളുമെല്ലാം കുഞ്ഞുണ്ണി സഞ്ചരിച്ച വഴികളെ പ്രാപ്‌തമാക്കി.  ഈ വഴികളൊക്കെ സഞ്ചരിച്ച കുഞ്ഞുണ്ണിയോട് ആരാണ് കുഞ്ഞുണ്ണിയുടെ കവിയെന്നു ചോദിച്ചാൽ യാതൊരു സംശയവും ഇല്ലാതെ പറയും പൂന്താനമാണെന്റെ കവി.  നമ്പൂതിരിമാരോടും നമ്പൂതിരി ഫലിതങ്ങളോടും ചെറുപ്പം മുതൽക്കു തന്നെ കുഞ്ഞുണ്ണിക്ക് ഏറെ പ്രിയമായിരുന്നു. കേട്ടതും കുറിച്ചിട്ടതുമായ നമ്പൂതിരി ഫലിതങ്ങളെല്ലാം  ചേർത്ത് കുഞ്ഞുണ്ണിമാഷ് ഒരു പുസ്തകമാക്കിയിട്ടുണ്ട്. പുസ്തകത്തിന്റെ പേരും നമ്പൂതിരി ഫലിതങ്ങൾ എന്നാണ്.  

കുഞ്ഞുണ്ണിക്കവിതകൾ തിരുവുള്ളവരുടെ വചനങ്ങളെ അനുസ്‌മരിപ്പിക്കുന്നവയാണെന്ന്  വൈലോപ്പിള്ളി വിശേഷിപ്പിച്ചിട്ടുണ്ട്.  കുഞ്ഞുണ്ണിക്കവിതകൾ വെളിപാടുകളാണ്.  അമ്മയെന്നാൽ അമ്മിഞ്ഞക്കല്ല് എന്ന രീതിയിലുള്ള വെളിപാടുകൾ.  മനുഷ്യ ബോധത്തിന്റെ അടിത്തട്ടിൽ കിടക്കുന്ന ഉണ്മയെ ആവാഹിച്ച് പുറത്തേക്ക് കൊണ്ട് വരുന്ന വരികൾ  ഈ വെളിപാടുകൾ ഓരോന്നും ഓരോ സന്ദേശമാണ്. നാഗരികതയുടെ കടന്നാക്രമണം നമ്മുടെ നാട്ടിൻപുറങ്ങളുടെ ജീവിതക്രമത്തെ മാറ്റി മറിച്ചതിൽ  കവി വല്ലാതെ ദുഖിച്ചു.  മലയാളിയിൽ അമ്മയും മണ്ണും മലയാളവും ഒന്നായി കാണാൻ കവി ആഗ്രഹിച്ചു.  കുഞ്ഞുണ്ണി മാസ്റ്റർ മലയാള ഭാഷയുള്ളിടത്തോളം കാലം അനശ്വരനാണ്.  കുഞ്ഞുണ്ണി മാഷിന് മരണമില്ല.