വധുവരന്മാരുടെ തലമുട്ടിച്ച സംഭവം; പോലീസ് കേസെടുത്തു, ഉടൻ അറസ്റ്റ്
പാലക്കാട്: പല്ലശനയില്‍ ദമ്പതിമാരുടെ തലകൂട്ടിയിടിപ്പിച്ച സംഭവത്തിൽ പോലീസ് കേസെടുത്തു. ദേഹോപദ്രവമേൽപ്പിക്കൽ, സ്ത്രീത്വത്തെ അപമാനിക്കൽ വകുപ്പുകൾ ചുമത്തിയാണ് കേസെടുത്തിരിക്കുന്നത്.
വനിതാ കമ്മീഷൻ നിർദേശത്തെ തുടർന്നാണ് പോലീസ് കേസെടുത്തത്. കഴിഞ്ഞ ദിവസം വധുവരന്മാരുടെ മൊഴി പോലീസ് രേഖപ്പെടുത്തിയിരുന്നു. ദമ്പതിമാരുടെ തലകൂട്ടിയിടിപ്പിച്ച പ്രതി സുഭാഷിനെ ഉടൻ അറസ്റ്റ് ചെയ്യുമെന്നും പോലീസ് അറിയിച്ചു.
പല്ലശന സ്വദേശിയായ സച്ചിന്‍റെ വിവാഹ ശേഷം വധു വരന്‍റെ വീട്ടിലേക്ക് വന്നുകയറുന്ന സമയത്താണ് സച്ചിന്‍റെയും വധു സജ്‌ലയുടെയും തലകള്‍ തമ്മില്‍ പിറകില്‍ നിന്നയാള്‍ കൂട്ടിയിടിപ്പിച്ചത്.
അപ്രതീക്ഷിതമായി ബലം പ്രയോഗിച്ച് തലകള്‍ കൂട്ടിമുട്ടിച്ചത് വധൂവരന്‍മാരുടെ പിന്നില്‍ നിന്ന അയല്‍വാസിയായിരുന്നു. അപ്രതീക്ഷിതമായ ഈ കൂട്ടിയിടിപ്പിക്കലില്‍ വേദനകൊണ്ട പുളഞ്ഞ സജ്‌ല കരഞ്ഞുകൊണ്ടാണ് സച്ചിന്‍റെ വീട്ടിലേക്ക് കയറിയത്.
പ്രസ്തുത സംഭവത്തിന്‍റെ വീഡിയോ സമൂഹമാധ്യമങ്ങളില്‍ വ്യാപകമായി പ്രചരിച്ചതോടെയാണ് രൂക്ഷമായ വിമര്‍ശനം ഉയര്‍ന്നത്.
Leave A Comment