പുഴയിൽ കുളിക്കാനിറങ്ങിയ വിദ്യാർഥി മുങ്ങി മരിച്ചു
ഇളന്തിക്കര: കോഴിത്തുരുത്ത് മണൽബണ്ടിന് സമീപം പുഴയിൽ കുളിക്കാനിറങ്ങിയ വിദ്യാർഥി മുങ്ങി മരിച്ചു. പറവൂർ മൂകാംബി റോഡ് തെക്കിനേടത്ത് (സ്‌മരണിക) മനീക്ക് പൗലോസിന്റെയും ടീനയുടെയും മകൻ മാനവ് (17) ആണ് മരിച്ചത്. ബുധൻ വൈകിട്ട് നാലിന് മറ്റ് ഏഴ് സുഹൃത്തുക്കൾക്കൊപ്പമാണ് മാനവ് ഇവിടെ എത്തിയത്.ആദ്യം ഒരാൾ പുഴയിലിറങ്ങിയെങ്കിലും നീന്താൻ സാധിക്കാത്തതിനാൽ തിരിച്ചു കയറി. ഇതോടെ മാനവ് പുഴയിലേക്ക് നീന്താനിറങ്ങി. മാനവ് മുങ്ങിപ്പോകുന്നതു കണ്ട് ഒരു സുഹൃത്ത് കയറിപ്പിടിച്ചു. അതോടെ രണ്ട് പേരും മുങ്ങി. ഉടനെ വേറൊരു സുഹൃത്തു മാനവിനെ രക്ഷിക്കാൻ ശ്രമിച്ചയാളെ പിടിച്ചുകയറ്റി. എന്നാൽ, മാനവ് പുഴയിലേക്ക് താഴ്ന്നുപോയി. നാട്ടുകാരുടെ നേതൃത്വത്തിൽ തിരച്ചിൽ നടത്തിയെങ്കിലും കണ്ടെത്താനായില്ല.
ഫയർഫോഴ്സ‌ിന്റെ സ്കൂബ ടീം മാനവിനെ കണ്ടെത്തി ചാലാക്ക മെഡിക്കൽ കോളജിലെത്തിച്ചെങ്കിലും രക്ഷിക്കാനായില്ല. അണ്ടർ - 19 കേരള ക്രിക്കറ്റ് ടീമിലേക്ക് തിരഞ്ഞെടുക്കപ്പെട്ടിരുന്ന മാനവ് പറവൂർ ഗവ.ഹയർസെക്കൻഡറി സ്‌കൂളിലെ പ്ലസ്‌ടു (ബയോളജി) വിദ്യാർഥിയാണ്. സഹോദരൻ: നദാൽ തോമസ്.മൃതദേഹം ചാലാക്ക മെഡിക്കൽ കോളേജ് മോർച്ചറിയിൽ. വ്യാഴം രാവിലെ ഇൻക്വസ്റ്റ് നടപടികൾ പൂർത്തിയാക്കി കൊച്ചി മെഡിക്കൽ കോളേജിൽ.
Leave A Comment