കൊച്ചി : കുർബാന ഏകീകരിച്ചുകൊണ്ടുള്ള സർക്കുലർ എന്തുകൊണ്ട് അംഗീകരിക്കുന്നില്ലെന്നു വിശദീകരിച്ച് എറണാകുളം-അങ്കമാലി അതിരൂപതയിലെ വൈദികർ വത്തിക്കാനുൾപ്പെടെയുള്ള സഭാധികൃതർക്കു കുറിപ്പു നൽകും. അതിരൂപത അപ്പൊസ്തൊലിക് അഡ്മിനിസ്‌ട്രേറ്റർ മാർ ആൻഡ്രൂസ് താഴത്തിന്റെ സർക്കുലർ ബഹുഭൂരിപക്ഷം പള്ളികളിലും വായിച്ചിരുന്നില്ല. തുടർന്നാണ് അതിന്റെ കാരണം വ്യക്തമാക്കി അഡ്മിനിസ്‌ട്രേറ്റർക്കും സിനഡ് പിതാക്കൻമാർക്കും നുൺഷ്യോയ്ക്കും വത്തിക്കാനും നൽകാൻ തീരുമാനിച്ചത്.

ജനാഭിമുഖ കുർബാനയാണ് അതിരൂപതയുടെ പൊതുവികാരമെന്നും മനസ്സാക്ഷിക്കു വിരുദ്ധമായി എന്തെങ്കിലും ചെയ്യാൻ നിർബന്ധിക്കരുതെന്നുമാണ് പ്രമേയത്തിന്റെ മുഖ്യ ഉള്ളടക്കം. മാസാദ്യ ധ്യാനത്തിന്റെ പിന്നാലെ 16 ഫൊറോനകളിലും ചൊവ്വാഴ്ച വൈദികർ സംഗമിച്ചിരുന്നു. അതിനിടെയാണ് എല്ലാ വൈദികരും ഒപ്പിട്ട പ്രമേയത്തിന്റെ പകർപ്പ് സഭാധികൃതർക്കു നൽകാൻ തീരുമാനിച്ചത്.

മാർ താഴത്തിന്റെ സർക്കുലർ ആദ്യം അതിരൂപതയുടെ ഔദ്യോഗിക സംവിധാനങ്ങൾ പ്രസിദ്ധീകരിച്ചിരുന്നില്ല. എന്നാൽ, സർക്കുലർ വായിക്കാൻ നിർദേശിച്ചിരുന്ന ഞായറാഴ്ച രാവിലെ പതിനൊന്നരയോടെ ഔദ്യോഗിക വെബ്‌സൈറ്റിൽ വന്നു. അതു വൈദികർക്കു ഞെട്ടലായി. തുടർന്ന് നൂറോളം വൈദികരെത്തി കൂരിയ അംഗങ്ങളെക്കണ്ട് പ്രതിഷേധമറിയിച്ചു. സർക്കുലർ പ്രസിദ്ധീകരിക്കാൻ കൂരിയയുടെമേൽ സമ്മർദമുണ്ടായെന്നാണ് വൈദികർ കരുതുന്നത്. അതേസമയം, ഞായറാഴ്ച രാവിലെയുള്ള കുർബാനകൾ കഴിഞ്ഞശേഷമാണ് അന്നു വായിക്കേണ്ട സർക്കുലർ ഔദ്യോഗികമായി അതിരൂപത പുറത്തുവിട്ടതെന്നതും ചൂണ്ടിക്കാണിക്കപ്പെടുന്നു.