ചികിത്സയിൽ ആയിരുന്ന കാട്ടുകൊമ്പൻ ചരിഞ്ഞു
ചാലക്കുടി: കാലില്‍ പരിക്കേറ്റതിനെ തുടര്‍ന്ന് വനംവകുപ്പിന്റെ നേതൃത്വത്തില്‍ ചികിത്സ നല്കിയിരുന്ന കാട്ടുകൊമ്പന്‍ ചെരിഞ്ഞു. ചൊവ്വാഴ്ച രാവിലെയാണ് ആനയെ ചെരിഞ്ഞ നിലയില്‍ കണ്ടെത്തിയത്. പന്ത്രണ്ട് വയസ്സ് പ്രായമുള്ള കൊമ്പന് മുറിവിലൂടെയുണ്ടായ അണുബാധയാണ് മരണകാണമെന്നാണ് പ്രാഥമിക നിഗമനം.സെപ്തംബര്‍ ആദ്യവാരത്തിലാണ് വാഴച്ചാല്‍ ഡിവിഷനിലെ അതിരപ്പിള്ളി റേഞ്ച് പരിധിയില്‍ പിന്‍കാലില്‍ പരിക്കേറ്റ നിലയില്‍ ആനയെ കണ്ടത്. തുടര്‍ന്ന് 19ന് വിദഗ്ദ സംഘത്തിന്റെ നേതൃത്വത്തില്‍ മയക്കുവെടിവച്ച് ചികിത്സ നല്കി. പിന്നീട് മലയാറ്റൂര്‍ ഡിവിഷന്‍ കാലടി റേഞ്ച് പരിധിയില്‍ പരിക്ക് ഭേദമാകാതെ കണ്ട ആനയ്ക്ക് ഒക്‌ടോബര്‍ 7ന് വീണ്ടും മയക്കുവെടിവച്ച് ചികിത്സ നല്കിരുന്നു. തുടര്‍ന്ന് നടത്തിയ നിരീക്ഷണത്തില്‍ ആനയുടെ പരിക്ക് ഭേദമായതായും തീറ്റയെടുക്കുന്നതായും കണ്ടെത്തി.
ഇക്കഴിഞ്ഞ 17ന് കിടക്കുന്ന നിലയില്‍ കണ്ട ആനക്ക് വീണ്ടും വിദഗ്ദ സംഘത്തിന്റെ നേതൃത്വത്തില്‍ ചികിത്സ നല്കുകയും ചെയ്തിരുന്നു. ഇതിനിടെയാണ് ചൊവ്വാഴ്ച ആനയെ ചെരിഞ്ഞ നിലയില്‍ കണ്ടത്. മലയാറ്റൂര്‍ ഡിഎഫ്ഒ പി കാര്‍ത്തികിന്റെ നേതൃത്വത്തില്‍ ഫോറസ്റ്റ് വെറ്റിനറി ഓഫീസര്‍ ഡോ. ബിനോയ് സി ബാബു, ഡോ. മിനേഷ് ചാക്കോച്ചന്‍, ഡോ. എഡിസണ്‍ മാത്യു എന്നിവര്‍ പോസ്റ്റുമോര്‍ട്ടം നടത്തി സംസ്‌ക്കരിച്ചു.
Leave A Comment