അനധികൃത റിക്രൂട്ടിങ് ഏജൻസികളെ കുടുക്കാൻ എറണാകുളം റൂറൽ പോലീസ്
ആലുവ : അനധികൃത റിക്രൂട്ടിങ് ഏജൻസികൾ, വ്യാജ വിസ നൽകി ജനങ്ങളെ കബളിപ്പിക്കുന്നവർ എന്നിവർക്കെതിരേ കർശന നടപടികളുമായി റൂറൽ ജില്ലാ പോലീസ്. ഇത്തരത്തിലുള്ള സംഭവങ്ങൾ കൂടുതലായി റിപ്പോർട്ട് ചെയ്യുന്ന പശ്ചാത്തലത്തിൽ ഏജൻസികളെ കുറിച്ചും വ്യക്തികളെ കുറിച്ചുമുള്ള വിവരങ്ങൾ പോലീസ് ശേഖരിച്ചുവരികയാണെന്ന് റൂറൽ എസ്.പി. വിവേക് കുമാർ പറഞ്ഞു.
പ്രായക്കൂടുതൽ ഉള്ളവർക്കും ഐ.ഇ.എൽ.ടി.എസ്. ഇല്ലാത്തവർക്കും കാനഡയിൽ കാർഷിക മേഖലയിലും ഹോട്ടൽ രംഗത്തും ജോലി വാഗ്ദാനം ചെയ്ത് പണം വാങ്ങി കബളിപ്പിച്ചെന്ന പരാതിയിൽ മൂവാറ്റുപുഴ കെ.എസ്.ആർ.ടി.സി.ക്കു സമീപം പ്രവർത്തിക്കുന്ന പെന്റാ ഓവർസീസ് റിക്രൂട്ട്‌മെന്റ് എന്ന സ്ഥാപനത്തിനെതിരേ മൂവാറ്റുപുഴ പോലീസ് കേസ് രജിസ്റ്റർ ചെയ്തിട്ടുണ്ട്. 24 ഉദ്യോഗാർഥികളിൽ നിന്നായി ഏകദേശം 45 ലക്ഷം രൂപ കബളിപ്പിച്ചെടുത്തെന്നാണ് പരാതി.
സമാനമായ രീതിയിൽ കാനഡയിൽ ജോലി വാഗ്ദാനം ചെയ്ത് ഉദ്യോഗാർഥിയിൽ നിന്ന് അഞ്ച് ലക്ഷം രൂപ തട്ടിയെടുത്തതായി പരാതി ലഭിച്ചതിനെ തുടർന്ന് വരാപ്പുഴയിലും കേസ് രജിസ്റ്റർ ചെയ്തിട്ടുണ്ട്.
Leave A Comment