ഇന്ന് രാത്രി ഇറാന് കഠിനമായിരിക്കും; ഭീഷണിയുമായി ട്രംപ്
വാഷിംഗ്ടൺ: ഇറാനെതിരെ ഇന്ന് രാത്രി അതിശക്തമായ സൈനിക നീക്കം നടത്തുമെന്ന ഭീഷണിയുമായി യുഎസ് പ്രസിഡന്റ് ഡോണാൾഡ് ട്രംപ്. സ്വന്തം സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യൽ വഴിയാണ് ലോകത്തെ ഞെട്ടിച്ചുകൊണ്ട് ട്രംപ് ഈ പ്രസ്താവന നടത്തിയത്. അമേരിക്ക ഇന്ന് രാത്രി ഇറാനെതിരെ അതിശക്തമായ ആക്രമണം നടത്തും. ഇറാന്റെ നാവികസേന, വ്യോമസേന, റഡാർ സംവിധാനങ്ങളും മറ്റ് പ്രതിരോധ മാർഗങ്ങളും യുഎസ് സൈന്യം ഇല്ലാതാക്കിക്കഴിഞ്ഞുവെന്നും ട്രംപ് അവകാശപ്പെട്ടു. കഴിഞ്ഞ ദിവസങ്ങളിലും സമാനമായ മുന്നറിയിപ്പുകൾ ട്രംപ് നൽകിയിരുന്നു.
ഇറാന്റെ സാമ്പത്തിക സ്രോതസായ ഖാർഗ് ദ്വീപ് വരും ദിവസങ്ങളിൽ പിടിച്ചെടുക്കും. ഇറാന്റെ എണ്ണ കയറ്റുമതിയുടെ 90 ശതമാനവും കൈകാര്യം ചെയ്യുന്നത് ഈ തന്ത്രപ്രധാന ദ്വീപ് വഴിയാണ്. വെനസ്വേലയിൽ ചെയ്തതുപോലെ ഇറാനിലെ എണ്ണ, വാതക വിപണികളുടെ പൂർണ നിയന്ത്രണം അമേരിക്ക ഏറ്റെടുക്കുമെന്നും ട്രംപ് കൂട്ടിച്ചേർത്തു.
ട്രംപിന്റെ പുതിയ ഭീഷണിയോടെ മിഡിൽ ഈസ്റ്റിൽ യുദ്ധഭീതിയും അന്താരാഷ്ട്ര തലത്തിൽ നയതന്ത്ര ആശങ്കകളും വർധിച്ചിരിക്കുകയാണ്. അതിനിടെ മേഖലയിലെ അരക്ഷിതാവസ്ഥ കാരണം ഹോർമുസ് കടലിടുക്ക് അടയ്ക്കുകയാണെന്ന് ഇറാന് അറിയിച്ചു. കപ്പലുകൾക്ക് പൂർണ നിരോധനം ഏർപ്പെടുത്തി. എണ്ണ ടാങ്കറുകളും വാണിജ്യ കപ്പലുകളും ഉൾപ്പെടെ എല്ലാത്തരം കപ്പലുകൾക്കും നിരോധനമുണ്ട്.
Leave A Comment