എംവിഡിക്ക് കെഎസ്ഇബി വക ഷോക്ക് തുടരുന്നു; ആര്‍ടിഒ ഓഫീസിന്‍റെ ഫ്യൂസ് ഊരി
തിരുവനന്തപുരം: കെഎസ്ഇബി എംവിഡി പോര് തുടരുന്നു. ബില്‍ അടക്കാത്തതിനാല്‍ കാസര്‍ഗോഡ് കറന്തക്കാടുള്ള ആര്‍ടിഒ എന്‍ഫോഴ്‌സ്‌മെന്‍റ് ഓഫീസിലെ ഫീസ് കെഎസ്ഇബിക്കാര്‍ ഊരി. ഇതോടെ ആര്‍ടിഒ ഓഫീസ് പ്രവര്‍ത്തനം തടസപ്പെട്ടു.
23,000 രൂപ വൈദ്യുത ബില്‍ അടക്കാനുള്ള അവസാന ദിവസം ഈ മാസം 26 ആയിരുന്നു. സമയം കഴിഞ്ഞിട്ടും ബില്‍ അടക്കാത്തതിനാൽ കടുത്തനടപടിയിലേക്ക് കെഎസ്ഇബി കടക്കുകയായിരുന്നു.
കഴിഞ്ഞദിവസം വയനാട് കല്‍പ്പറ്റയില്‍ മോട്ടോര്‍ വാഹന വകുപ്പിന്‍റെ എന്‍ഫോഴ്‌സ്‌മെന്‍റ് വിഭാഗം പ്രവര്‍ത്തിക്കുന്ന കെട്ടിടത്തിന്‍റെ വൈദ്യുതി കെഎസ്ഇബി വിച്ഛേദിച്ചിരുന്നു. പിന്നാലെ അടിയന്തര ഫണ്ടില്‍ നിന്ന് പണമെടുത്ത് എംവിഡി ബില്ലടച്ചു. ഇതോടെ വൈദ്യുതി ബന്ധം പുനഃസ്ഥാപിക്കുകയും ചെയ്തു.
അടുത്തിടെ, വയനാട്ടില്‍ വാഹനത്തില്‍ തോട്ടി കെട്ടിവെച്ച് പോയതിന് കെഎസ്ഇബിക്ക് എഐ കാമറയുടെ പിഴ നോട്ടീസ് ലഭിച്ചത് വാര്‍ത്തയായിരുന്നു. 20,500 രൂപ പിഴയൊടുക്കണമെന്നാണ് മോട്ടോര്‍വാഹന വകുപ്പ് കെഎസ്ഇബിക്ക് നോട്ടീസ് അയച്ചത്.
അമ്പലവയല്‍ ഇലക്ട്രിക്കല്‍ സെക്ഷന്‍ ഓഫീസിലെ ജീവനക്കാര്‍ക്കായി വാടകയ്‌ക്കെടുത്ത ജീപ്പിനായിരുന്നു ഫൈന്‍ കിട്ടിയത്.
ഇതിന് പിന്നാലെയാണ് മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്‍റ് വിഭാഗം പ്രവര്‍ത്തിക്കുന്ന കെട്ടിടത്തിന്‍റെ ഫ്യൂസ് കെഎസ്ഇബി ഊരിയത്. ജില്ലയിലെ എഐ കാമറകളുടെ പ്രവര്‍ത്തനം നിയന്ത്രിക്കുന്ന കെട്ടിടത്തിന്‍റെ വൈദ്യുതി ബന്ധമാണ് വിച്ഛേദിച്ചത്.
Leave A Comment