നെടുമ്പാശ്ശേരി : റോഡ് സുരക്ഷയ്ക്കായി വിട്ടുവീഴ്ചയില്ലാതെ നടപടികൾ തുടരുമെന്ന് ട്രാൻസ്പോർട്ട് കമ്മിഷണർ എസ്. ശ്രീജിത്ത് പറഞ്ഞു. നെടുമ്പാശ്ശേരി സിയാൽ കൺവെൻഷൻ സെന്ററിൽ നടന്ന മോട്ടോർ വാഹന വകുപ്പ് മധ്യമേഖലയിലെ ആറ് ജില്ലകളിലെ ഉദ്യോഗസ്ഥരുടെ യോഗത്തിൽ സംസാരിക്കുകയായിരുന്നു അദ്ദേഹം.

റോഡിൽ നിയമം ലംഘിക്കുന്ന എല്ലാ വാഹനങ്ങൾക്കെതിരേയും ഹൈക്കോടതി നിർദേശത്തിന്റെ അടിസ്ഥാനത്തിൽ ശക്തമായ നടപടികളുമായി മുന്നോട്ടുപോകും. റോഡിൽ ഒരു ജീവൻപോലും പൊലിയരുതെന്ന ദൃഢനിശ്ചയത്തോടെയാണ് സർക്കാരും ഗതാഗത വകുപ്പും നീങ്ങുന്നത്. റോഡ് സുരക്ഷയിൽ കേരളത്തെ ഇന്ത്യക്കാകെ മാതൃകയാക്കുകയാണ് ലക്ഷ്യം. അപകടകരമായ ഡ്രൈവിങ്ങിന് ലൈസൻസ് റദ്ദാക്കപ്പെടുന്ന ഡ്രൈവർമാർക്ക് എടപ്പാളിലെ ഡ്രൈവേഴ്സ് ട്രെയിനിങ് റിസർച്ച് ഇൻസ്റ്റിറ്റ്യൂട്ടിൽ പരിശീലനം നൽകും. ബസ് ഉടമകളുടെ അസോസിയേഷനും ഡ്രൈവർമാർക്കു പരിശീലനം നൽകണമെന്ന് ആവശ്യപ്പെട്ടിട്ടുണ്ടെന്ന് കമ്മിഷണർ പറഞ്ഞു. ഡെപ്യൂട്ടി ട്രാൻസ്പോർട്ട് കമ്മിഷണർ മാരായ ഷാജി മാധവൻ, എം.പി. ജെയിംസ്, വിവിധ ജില്ലകളിലെ മോട്ടോർ വാഹന വകുപ്പ് ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.