അഷ്ടമിച്ചിറയിൽ ബൈക്ക് അപകടത്തിൽ യുവതിക്ക് ദാരുണാന്ത്യം
മാള: അഷ്ടമിച്ചിറയിൽ ബൈക്ക് അപകടത്തിൽ യുവതിക്ക് ദാരുണാന്ത്യം. പുത്തൻചിറ സ്വദേശി പുല്ലൂപറമ്പിൽ ജേക്കബിന്റെ ഭാര്യ ലിജയാണ് മരിച്ചത്. ഇന്നലെ വൈകിട്ട് ഏകദേശം 7 മണിയോടുകൂടിയാണ് അപകടം നടന്നത്.ഭർത്താവിനൊപ്പം അഷ്ടമിച്ചിറയിൽ നിന്നും പുത്തൻചിറയിലുള്ള വീട്ടിലേക്ക് പോകുന്ന വഴി എതിർഭാഗത്തുനിന്നും മറ്റൊരു കാറിനെ ഓവർടേക്ക് ചെയ്തു വന്നിരുന്ന ബൈക്ക് ജേക്കബിന്റെ വാഹനത്തിൽ തട്ടുകയും ബൈക്കിന്റെ പുറകിൽ ഉണ്ടായിരുന്ന ലിജ മലർന്നടിച്ച് റോഡിലേക്ക് വീഴുകയും ആയിരുന്നു. തുടർന്ന് ബൈക്ക് എതിരെ വന്നിരുന്ന മറ്റൊരു കാറിൽ ഇടിച്ച് നിൽക്കുകയായിരുന്നു.
തലയ്ക്ക് ഗുരുതരമായി പരിക്കേറ്റ ലിജയെ ആശുപത്രിയിൽ എത്തിച്ച് സർജറി നടത്തിയെങ്കിലും ജീവൻ രക്ഷിക്കാനായില്ല. ഇന്ന് രാവിലെ 10.15 ഓടെയാണ് ലിജ മരണത്തിന് കീഴടങ്ങിയത്.
ഇവരെ ഇടിച്ച ബൈക്ക് നിർത്താതെ പോവുകയായിരുന്നു. ജേക്കബിന് ഗുരുതര പരിക്കുകൾ ഒന്നും ഇല്ല. മാള പോലീസ് അന്വേഷണം ആരംഭിച്ചിട്ടുണ്ട്.
Leave A Comment