മാള: സെപ്തംബര്‍ മാസം അവസാനമായിട്ടും ചാലക്കുടി താലൂക്കിലെ പല റേഷൻ കടകളിലും ഈ മാസത്തെ അരി സ്റ്റോക്ക് എത്തിയിട്ടില്ല. കൂടുതൽ എത്താറുള്ള മട്ട അരി പോലും ആവശ്യത്തിന് സപ്ലൈകോയുടെ ഗോഡൗണിൽ എത്തിയിട്ടില്ല. താലൂക്കിൽ 195 റേഷൻകടകളിൽ നൂറ്റിപ്പത്തോളം കടകളിൽ മാത്രമേ റേഷൻ എത്തിയിട്ടുള്ളൂ. 

ഓണത്തിന് വിതരണം ചെയ്ത സ്‌പെഷ്യൽ അരികൾക്ക് പകരമായി സ്റ്റോക്കെത്താത്തതാണ് പ്രശ്നമെന്ന് ബന്ധപ്പെട്ടവര്‍ ചൂണ്ടിക്കാട്ടുന്നു.. താലൂക്കിൽ 195 റേഷൻകടകളിൽ നൂറ്റിപ്പത്തോളം കടകളിൽ മാത്രമേ റേഷൻ എത്തിയിട്ടുള്ളൂ. ബാക്കി കടകളിൽ അരി എന്നെത്തുമെന്ന് പറയാൻ പറ്റാത്ത സ്ഥിതിയാണുള്ളത്. അതിനിടെ പൊതു വിപണിയിൽ അരിവില കുതിക്കുകയാണ്. മൂന്നുമാസത്തിനിടെ അരിവില കിലോഗ്രാമിന് ശരാശരി 13 രൂപ ഉയർന്നപ്പോൾ മലയാളിയുടെ പോക്കറ്റിൽനിന്ന് ചോർന്നത് 780 കോടി രൂപ. 10 ലക്ഷം ടൺ അരിയാണ് മൂന്നുമാസത്തേക്ക് കേരളത്തിന് വേണ്ടത്. ഇതിൽ ആറുലക്ഷം ടണ്ണും പൊതുവിപണിയിൽനിന്നാണ്.

മുമ്പ് വെള്ള അരിക്ക് മട്ട അരിയെക്കാൾ വിലക്കുറവായിരുന്നു. ഇപ്പോൾ മട്ടയെ കടത്തിവെട്ടി വെള്ള മുമ്പിലെത്തി. 50-53 തോതിലായിരുന്നു, വെള്ള അരിക്ക് വ്യാഴാഴ്ചത്തെ മൊത്തവില. മട്ടയ്ക്ക് 48-52 വരെയും. ചില്ലറവില 3-4 രൂപ കൂടും. ആന്ധ്ര ജയ (വെള്ള) പുതിയ ലോഡ് ശനിയാഴ്ച എത്തിയത് 55 രൂപ നിരക്കിലാണെന്ന്  മൊത്തവിതരണക്കാര്‍ പറഞ്ഞു.