ഞായറാഴ്ച രാത്രി എട്ടിന് മുൻപ് മുഴുവൻ റീഫണ്ടും നൽകണം; ഇന്ഡിഗോയോട് കേന്ദ്രം
ന്യൂഡല്ഹി: റദ്ദാക്കിയ വിമാനങ്ങളുടെ ടിക്കറ്റ് നിരക്ക് റീഫണ്ട് ചെയ്യുന്ന പ്രക്രിയ ഞായറാഴ്ച വൈകുന്നേരത്തോടെ പൂര്ത്തിയാക്കാന് ഇന്ഡിഗോയോട് ആവശ്യപ്പെട്ട് കേന്ദ്രസര്ക്കാര്.
യാത്രക്കാരുടെ ബാഗേജുകള് രണ്ടു ദിവസത്തിനകം മടക്കിനല്കിയെന്ന് ഉറപ്പാക്കാനും കേന്ദ്ര വ്യോമയാന മന്ത്രാലയം നിര്ദേശിച്ചു.
ഇൻഡിഗോയിൽ ജീവനക്കാരുടെ ക്ഷാമം മൂലം സര്വീസുകള് മുടങ്ങുന്നത് ശനിയാഴ്ച അഞ്ചാം ദിവസത്തിലേക്ക് കടന്നിരിക്കുകയാണ്. റീഫണ്ട് പ്രക്രിയയില് എന്തെങ്കിലും കാലതാമസം ഉണ്ടാവുകയോ നിര്ദേശം പാലിക്കാതെ വരികയോ ചെയ്താല് നടപടി സ്വീകരിക്കുമെന്നും മന്ത്രാലയം മുന്നറിയിപ്പ് നല്കി.
റദ്ദാക്കിയതോ തടസപ്പെട്ടതോ ആയ എല്ലാ വിമാന സര്വീസുകളുടെയും റീഫണ്ട് പ്രക്രിയ ഞായറാഴ്ച രാത്രി എട്ടോടെ പൂര്ത്തിയാക്കണമെന്നാണ് മന്ത്രാലയത്തിന്റെ പ്രസ്താവനയില് പറയുന്നത്.
അതേസമയം, സാഹചര്യം മുതലെടുത്ത് മറ്റ് വിമാനക്കമ്പനികള് ടിക്കറ്റ് നിരക്ക് കുത്തനെ ഉയര്ത്തുന്നതും ഇരുട്ടടിയായി. അവസരം മുതലാക്കരുതെന്ന് വിമാന കമ്പനികള്ക്ക് കേന്ദ്ര വ്യോമയാന മന്ത്രാലയം കര്ശന നിര്ദേശം നല്കിയിട്ടുണ്ട്.
Leave A Comment