പഞ്ചവാദ്യത്തിന്റെ പെരുമ ലോകമെങ്ങും പടർത്തിയ കുഴൂർ നാരായണമാരാർ
വാദ്യകലാപ്രേമികൾക്ക് ഒരിക്കലും മറക്കാനാവാത്ത മഹാപ്രതിഭയാണ് പത്മഭൂഷൺ കുഴൂർ നാരായണമാരാർ. അസംഖ്യം പഞ്ചവാദ്യ ആസ്വാദകരെ ആഹ്ലാദിപ്പിച്ചും ആനന്ദിപ്പിച്ചും ആവേശഭരിതരാക്കിയും പഞ്ചവാദ്യത്തിന്റെ അനിർവചനീയമായ താളമാധുര്യം അനുഭവവേദ്യമാക്കിയ അതികായനായിരുന്നു അദ്ദേഹം. പഞ്ചവാദ്യരംഗത്തെ പ്രഥമഗണനീയനായ കലാകാരൻ എന്നതിലുപരി, ഈ കലാരൂപത്തിന്റെ വളർച്ചയ്ക്കും ജനകീയതയ്ക്കും വിലപ്പെട്ട സംഭാവനകൾ നൽകിയ ആചാര്യനുമായിരുന്നു കുഴൂർ നാരായണമാരാർ.
തിമിലവാദനത്തിലെ അപൂർവമായ കൈവഴക്കവും താളബോധവും കൊണ്ട് വിസ്മയകരമായ നാദശിൽപ്പങ്ങൾ തീർത്ത അദ്ദേഹം, വൈവിധ്യവും വൈശിഷ്ട്യവും ഒത്തുചേർന്ന അവതരണശൈലിയിലൂടെ ആസ്വാദകരുടെ ഹൃദയങ്ങളിൽ ഇടംനേടി. പഞ്ചവാദ്യത്തിന്റെ വശ്യത കേരളത്തിന്റെ അതിരുകൾക്കപ്പുറത്തേക്കും എത്തിച്ച ഈ കലാകുലപതിയുടെ പതിനഞ്ചാം ചരമവാർഷികം അദ്ദേഹത്തിന്റെ മഹത്തായ കലാജീവിതത്തെ വീണ്ടും ഓർമിപ്പിക്കുന്നു.
ഏഴു പതിറ്റാണ്ടോളം നീണ്ട കലാസപര്യയിലൂടെ ദേവോപാസനയുടെ ഭാഗമായി വാദ്യകലയിൽ അമൂല്യമായ സംഭാവനകളാണ് അദ്ദേഹം സമർപ്പിച്ചത്. കുഴൂർ എന്ന ഗ്രാമത്തിന്റെ പ്രശസ്തി ലോകമെങ്ങും എത്തിക്കുന്നതിൽ അദ്ദേഹത്തിന്റെ കലാപ്രതിഭയ്ക്ക് വലിയ പങ്കുണ്ട്. വാദ്യകലാസ്നേഹികളും ശിഷ്യന്മാരും ആദരപൂർവം അദ്ദേഹത്തെ 'കുഴൂരാശാൻ' എന്നാണ് വിളിച്ചിരുന്നത്.
കുഴൂർ ഏകാദശി മഹോത്സവം മുതൽ ലോകപ്രശസ്തമായ തൃശ്ശൂർ പൂരത്തിലെ വാദ്യമേളങ്ങൾ വരെ കേരളത്തിലെ പ്രമുഖ ഉത്സവവേദികളിലെല്ലാം അദ്ദേഹത്തിന്റെ സാന്നിധ്യം ശ്രദ്ധേയമായിരുന്നു. പഞ്ചവാദ്യത്തിൽ മാത്രമല്ല, തായമ്പകയിലും അദ്ദേഹം മികവ് തെളിയിച്ചു. കലാസപര്യയും ഈശ്വരാരാധനയും സമന്വയിച്ച സമ്പന്നമായ ജീവിതമായിരുന്നു ആ വാദ്യവിശാരദന്റേത്.
പഞ്ചവാദ്യത്തിന് പുതിയ പെരുമ നൽകിയ പ്രതിഭ
കൊല്ലവർഷം 1100-ലെ മേടമാസത്തിൽ ചിത്തിര നക്ഷത്രത്തിൽ മാണിക്യമംഗലം കൊച്ചുപിള്ളക്കുറുപ്പിന്റെയും കുഴൂർ നെടുമ്പറമ്പത്ത് മാരാത്ത് കുഞ്ഞിപ്പിള്ളയമ്മയുടെയും മകനായാണ് നാരായണമാരാർ ജനിച്ചത്. ചെറുപ്പംമുതൽ കുഴൂർ സുബ്രഹ്മണ്യസ്വാമി ക്ഷേത്രത്തിലെ ആചാരാനുഷ്ഠാനങ്ങളിലും വാദ്യകലാപരിപാടികളിലും പങ്കെടുത്തിരുന്നു. ക്ഷേത്രവുമായി ബന്ധപ്പെട്ട അനുഭവങ്ങളാണ് അദ്ദേഹത്തിന്റെ കലാജീവിതത്തിന് അടിത്തറയിട്ടത്.
പെരുമ്പിള്ളി കേശവമാരാർ, മാണിക്യമംഗലം നാരായണക്കുറുപ്പ്, കൊഴുക്കരപ്പിള്ളി രാമമാരാർ എന്നിവരായിരുന്നു പ്രധാന ഗുരുക്കന്മാർ. എരവിപുരത്ത് അപ്പുമാരാരിൽനിന്നും പഞ്ചവാദ്യം അഭ്യസിച്ചു. കുഴൂർ സുബ്രഹ്മണ്യസ്വാമി ക്ഷേത്രത്തിലായിരുന്നു അരങ്ങേറ്റം. ക്ഷേത്രത്തിലെ ദേവന്റെ അനുഗ്രഹവും ഗുരുക്കന്മാരുടെ ശിക്ഷണവും കഠിനമായ പരിശീലനവും അദ്ദേഹത്തെ പഞ്ചവാദ്യരംഗത്തെ പ്രമുഖനാക്കി വളർത്തി.
പഞ്ചവാദ്യരംഗത്ത് ശ്രദ്ധേയരായ കുട്ടപ്പമാരാരും ചന്ദ്രമാരാരും അദ്ദേഹത്തിന്റെ സഹോദരന്മാരായിരുന്നു. ഈ മൂന്നു പ്രതിഭകളും ചേർന്ന 'കുഴൂർ ത്രയം' പഞ്ചവാദ്യചരിത്രത്തിൽ സ്വന്തമായൊരു സ്ഥാനം നേടി. പഞ്ചവാദ്യത്തിന്റെ താളവൈവിധ്യത്തിലും അവതരണത്തിലെ മികവിലും ഇവർ നൽകിയ സംഭാവനകൾ ഏറെ ശ്രദ്ധേയമാണ്.
നാരായണമാരാരുടെ തിമിലവാദനത്തിലെ സവിശേഷതകൾ അനുകരിക്കുക എളുപ്പമായിരുന്നില്ല. താളവട്ടങ്ങളിലെ കൃത്യതയും ത്രിപുട താളത്തിലെ വിവിധ ശീലുകളും പ്രയോഗങ്ങളും അദ്ദേഹത്തിന്റെ അവതരണത്തിന് സവിശേഷമായ മിഴിവേകി. അന്നമനട ത്രയത്തോടൊപ്പം പഞ്ചവാദ്യവേദികൾ പങ്കിട്ട അദ്ദേഹം, അവരിൽനിന്നുള്ള അനുഭവങ്ങളും കലാപാഠങ്ങളും പരസ്പരം കൈമാറി. അന്നമനട ത്രയത്തിലെ കലാകാരന്മാരും അദ്ദേഹത്തിന് ഗുരുസ്ഥാനീയരായിരുന്നു.
താളത്തിന്റെ വിസ്മയലോകം
പഞ്ചവാദ്യത്തിന്റെ താളക്രമവും കാലവിന്യാസവും അതീവ സൂക്ഷ്മത ആവശ്യപ്പെടുന്നവയാണ്. ഒരു കാലത്തിൽനിന്ന്h മറ്റൊരു കാലത്തിലേക്ക് ക്രമാനുഗതമായി ഒഴുകിയെത്തുന്ന താളവിന്യാസം ആസ്വാദകരിൽ ആവേശവും ആനന്ദവും സൃഷ്ടിക്കുന്നു. ഈ സങ്കീർണമായ താളക്രമത്തെ അസാധാരണമായ കൈയടക്കത്തോടെ അവതരിപ്പിക്കാൻ നാരായണമാരാർക്ക് കഴിഞ്ഞിരുന്നു.
അദ്ദേഹത്തിന്റെ തിമിലയിൽ മറ്റു വാദ്യങ്ങളുടെ നാദവൈവിധ്യങ്ങൾ പോലും ആസ്വാദകർക്ക് അനുഭവപ്പെടുന്നതായി പലരും വിലയിരുത്തിയിരുന്നു. മൃദംഗം, ഘടം, മുഖർശംഖ്, തവിൽ തുടങ്ങിയ വാദ്യങ്ങളുടെ ശബ്ദവൈവിധ്യം ഓർമിപ്പിക്കുന്ന തരത്തിൽ താളത്തിന്റെ ഗതിയും നാദത്തിന്റെ ഗാംഭീര്യവും സമന്വയിപ്പിക്കാൻ അദ്ദേഹത്തിനുള്ള കഴിവ് വിസ്മയകരമായിരുന്നു.
അദ്ദേഹത്തിന്റെ പ്രമാണത്തിലുള്ള പഞ്ചവാദ്യം ആസ്വാദകർക്ക് പഞ്ചസാരപ്പായസവും പഞ്ചാമൃതവും പോലെ മധുരമുള്ള അനുഭവമായിരുന്നു. ഓരോ താളവിന്യാസത്തിലും നാദത്തിന്റെ സൗന്ദര്യവും ആവേശവും സമന്വയിച്ചു. ദേവന്മാരും ദേവതകളും താളമാധുരിയിൽ തുയിലുണരുന്നുവെന്നു തോന്നിപ്പിക്കുന്നതായിരുന്നു ആ അവതരണങ്ങളുടെ അനുഭൂതി.
അനുഷ്ഠാനകലയായ പരിഷവാദ്യത്തിൽനിന്നാണ് പഞ്ചവാദ്യം വളർച്ചയുടെ വിവിധ ഘട്ടങ്ങളിലൂടെ വികസിച്ചതെന്ന് കലാചരിത്രകാരന്മാർ ചൂണ്ടിക്കാട്ടുന്നു. ക്ഷേത്രങ്ങളുടെ നാലമ്പലങ്ങൾക്കുള്ളിൽ ആചാരങ്ങളുടെ ഭാഗമായി അവതരിപ്പിച്ചിരുന്ന ഈ വാദ്യരൂപം പിന്നീട് ജനകീയവും വിപുലവുമായ കലാവതരണമായി വളർന്നു. കേരളത്തിൽ രൂപംകൊണ്ട ഈ കലാരൂപത്തിന് രാജ്യത്തിനകത്തും പുറത്തും അംഗീകാരം ലഭിക്കുന്നതിൽ കുഴൂർ നാരായണമാരാരെപ്പോലുള്ള ആചാര്യന്മാരുടെ പങ്ക് നിർണായകമായിരുന്നു.
പഞ്ചവാദ്യത്തിന്റെ പ്രമാണക്കാരനെന്ന നിലയിൽ അദ്ദേഹത്തിനുണ്ടായിരുന്ന താളബോധവും നേതൃത്വപാടവവും അപാരമായിരുന്നു. ഒരു വാദ്യപ്രപഞ്ചത്തിന്റെ അമരക്കാരന് ആവശ്യമായ ധൈര്യവും ആത്മവിശ്വാസവും കലാപരമായ ഉൾക്കാഴ്ചയും അദ്ദേഹത്തിന്റെ അവതരണങ്ങളിൽ പ്രകടമായിരുന്നു.
പുരസ്കാരങ്ങളിലൂടെ അംഗീകാരം
കുഴൂർ നാരായണമാരാരുടെ കലാപ്രതിഭയ്ക്ക് രാജ്യം പത്മഭൂഷൺ നൽകി ആദരിച്ചു. കേരള സർക്കാരിന്റെ പല്ലാവൂർ അപ്പു മാരാർ പുരസ്കാരവും അദ്ദേഹത്തെ തേടിയെത്തി. വാദ്യകലാരംഗത്തെ സമഗ്രസംഭാവനകൾക്കുള്ള അംഗീകാരമായിരുന്നു ഈ ബഹുമതികൾ.
കേരള സംഗീത നാടക അക്കാദമി, കേരള കലാമണ്ഡലം, അഖില കേരള മാരാർ ക്ഷേമസഭ, മുംബൈ പൃഥ്വി, കേളി, വിശ്വഹിന്ദു പരിഷത്ത്, വാദ്യകലാസ്വാദകർ, തൃശ്ശൂർ പാറമേക്കാവ്, കോഴിക്കോട് വാദ്യകലാകേന്ദ്രം, കുഴൂർ പൗരാവലി, പൊറത്തുവീട്ടിൽ നാണു മാരാർ ഗുരുസ്മൃതി, സംസ്കാര സാഹിതി തുടങ്ങിയ സ്ഥാപനങ്ങളും സംഘടനകളും അദ്ദേഹത്തെ പുരസ്കാരങ്ങൾ നൽകി ആദരിച്ചിട്ടുണ്ട്.
തൃക്കാക്കര, ഏലൂർ നാരായണത്ത്, എടനാട്, ആലുവ പാറാട്ടുശാസ്താവ്, പേരുമംഗലം പാലിയം, തൃക്കരിയൂർ തുടങ്ങി വിവിധ ക്ഷേത്രങ്ങളും സാംസ്കാരിക സ്ഥാപനങ്ങളും അദ്ദേഹത്തിന് ഉപഹാരങ്ങൾ സമർപ്പിച്ചു. നിരവധി സുവർണഹാരങ്ങളും കീർത്തിമുദ്രകളും ഈ കലാപ്രതിഭയെ തേടിയെത്തി.
2009 മേയിൽ ജന്മനാളിനോടനുബന്ധിച്ച് അദ്ദേഹത്തിന്റെ ശതാഭിഷേകം വിപുലമായി ആഘോഷിച്ചിരുന്നു. ജീവിതത്തിന്റെ സായാഹ്നത്തിലും വാദ്യകലാപ്രേമികളുടെ ആദരവും സ്നേഹവും ഏറ്റുവാങ്ങാൻ അദ്ദേഹത്തിന് കഴിഞ്ഞു.
ഓർമകളിൽ ഇന്നും ജീവിക്കുന്ന ആചാര്യൻ
2011 ഓഗസ്റ്റ് 11-നാണ് കുഴൂർ നാരായണമാരാർ കാലയവനികയ്ക്കുള്ളിൽ മറഞ്ഞത്. എന്നാൽ അദ്ദേഹത്തിന്റെ വാദ്യകലാസംഭാവനകൾ ഇന്നും ആസ്വാദകരുടെ മനസ്സുകളിൽ ജീവിക്കുന്നു. പഞ്ചവാദ്യത്തിന്റെ താളമാധുര്യവും വശ്യതയും ജനഹൃദയങ്ങളിൽ പകർന്നുനൽകിയ അദ്ദേഹത്തിന്റെ കലാജീവിതം പുതുതലമുറയ്ക്ക് പ്രചോദനമാണ്.
കുഴൂർ നാരായണമാരാരുടെ സ്മരണ നിലനിർത്തുന്നതിനായി പ്രവർത്തിക്കുന്ന കുഴൂർ നാരായണമാരാർ ഫൗണ്ടേഷന് ടി. ഐ. മോഹൻദാസ് ചെയർമാനായും എം. എൻ. എസ്. നായർ ജനറൽ സെക്രട്ടറിയായും നേതൃത്വം നൽകുന്നു. ഫൗണ്ടേഷന്റെ കീഴിൽ വാദ്യകലാമണ്ഡലവും സജീവമായി പ്രവർത്തിക്കുന്നു. അന്നമനട മുരളീധരമാരാർ, അന്നമനട പ്രസാദ്, കൊരട്ടി സന്തോഷ്, കാവിൽ ഉണ്ണികൃഷ്ണവാര്യർ, കലാമണ്ഡലം അജു വിജയൻ തുടങ്ങിയവർ വാദ്യകലയിൽ പരിശീലനം നൽകുന്നു. വനിതകളുടെ മെഗാ പഞ്ചവാദ്യത്തിനുള്ള പരിശീലനവും ഇവിടെ നടന്നുവരുന്നു.
കുഴൂർ നാരായണമാരാർ താമസിച്ചിരുന്ന കൊരട്ടിയിലെ പഞ്ചായത്ത് കമ്യൂണിറ്റി ഹാൾ അദ്ദേഹത്തിന്റെ ഓർമകൾ നിലനിർത്തുന്ന സ്മാരകമായി നിലകൊള്ളുന്നു.
പഞ്ചവാദ്യത്തിന്റെ പെരുമ ലോകമെങ്ങും എത്തിച്ച മഹാപ്രതിഭയായിരുന്നു കുഴൂർ നാരായണമാരാർ. താളത്തിന്റെ ഗാംഭീര്യവും നാദത്തിന്റെ മാധുര്യവും കൊണ്ട് ആസ്വാദകഹൃദയങ്ങളെ കീഴടക്കിയ ആ മഹാനുഭാവന്റെ കലാജീവിതം കാലം എത്ര കഴിഞ്ഞാലും മങ്ങുകയില്ല. പഞ്ചവാദ്യചരിത്രത്തിൽ അദ്ദേഹത്തിന്റെ പേര് എന്നും തിളങ്ങിനിൽക്കും.
Leave A Comment