വാൽക്കണ്ണാടി  

ഹൈന്ദവ അനുഷ്ഠാനത്തിൽ ഭക്തി നിർഭരമായ അലൗകിക അന്തരീക്ഷത്തിൽ ആഘോഷപൂർവ്വമായി നവരാത്രി മഹോത്സവം വന്നെത്തി. കേരളത്തിൽ കന്നി-തുലാം മാസങ്ങളിൽ സരസ്വതി പൂജയായും ഇന്ത്യയുടെ മറ്റു ഭാഗങ്ങളിൽ അശ്വനി കാർത്തിക മാസങ്ങളിൽ ആയുധ പൂജയായും ആചരിക്കപ്പെടുന്ന മതപരമായ ആഘോഷത്തിന്റെ കാലമാണിത്.  വിജയദശമി നാളിന് പത്തു ദിവസം മുമ്പ് ആരംഭിച്ച് ഒൻപത് രാത്രികൾ നീണ്ടു നിൽക്കുന്ന ഉത്സവം എന്ന അർത്ഥത്തിൽ നവരാത്രി മാഹാത്മ്യമായി. 

ഒന്നാം ദിവസം പ്രത്യേക പൂജകളും മറ്റും നടത്തി വരുന്ന പതിവുണ്ട്.  പലയിടത്തും ഈ സ്ത്രോത്രാലാപം സംഗീത കലാപ്രകടനമായി നടത്താറുണ്ട്.  തിരുവനന്തപുരത്ത് ശ്രീപത്മനാഭ സ്വാമി ക്ഷേത്രത്തിൽ ഇതിനായി പ്രത്യേകം നീക്കി വച്ചിട്ടുള്ള നവരാത്രി മണ്ഡപത്തിൽ സ്വാതി തിരുനാൾ മഹാരാജാവിന്റെ കാലം തൊട്ട് നവരാത്രി പൂജയും ഒൻപതു ദിവസത്തെ സംഗീത പൂജയും നടത്തി വരുന്നു. 

നവരാത്രി പൂജ  ആരംഭിക്കുന്ന ദിവസം മുതൽ ഓരോ പ്രദേശത്തെയും ആളുകൾ ആരാധനയുടെ സ്വഭാവം അനുസരിച്ച് ഗ്രന്ഥങ്ങൾ, ആയുധങ്ങൾ തുടങ്ങിയവ പൂജാപീഠത്തിനു മുമ്പിൽ സമർപ്പിക്കുകയും വിജയദശമി നാളിൽ അവ തിരിച്ചെടുക്കുകയും ചെയ്യുന്നു.  തങ്ങളുടെ വിദ്യക്കോ  ജീവിതവൃത്തിക്കോ ദേവതയുടെ അനുഗ്രഹം ആർജ്ജിക്കുക എന്നതാണ് ഇതിനു പിന്നിലെ സങ്കല്പം. 

കുട്ടികളെ എഴുത്തിനിരുത്താനും കേരളീയർ തെരഞ്ഞെടുക്കുന്ന ദിവസം ഇതാണ്. കർണാടകത്തിലും ബംഗാളിലും മറ്റും ഇത് ദുർഗ്ഗാപൂജയ്ക്കുള്ള അവസരമാണ്. മൈസൂരിൽ ഇത് അവസാനിക്കുന്നത് രാജകീയമായ ഘോഷയാത്രയോടു കൂടിയാണ് എട്ടാമത്തെ പൂജാദിവസം ദുർഗാഷ്ടമിയായാണ് എല്ലായിടത്തും കണക്കാക്കി വരുന്നത്.  പൂജാവേദിയിൽ കൊലു എന്ന പേരിൽ വിഗ്രഹങ്ങളും പ്രതിമകളും പാവകളും നിരത്തി വച്ച് അലങ്കരിക്കുന്ന പതിവുണ്ട്.  

 

പരാശക്തി സ്വരൂപിണിയായ ദേവിയെ ആപൽനിവാരണമായും ധനാഭിവൃദ്ധിക്കായും പൂജിക്കുന്ന അതിപ്രധാന ദിവസമാണ് നവരാത്രി എന്ന് വിശേഷിപ്പിക്കുന്നത്. പരാശക്തിയുടെ മൂന്ന് രൂപങ്ങളാണ് സരസ്വതിയും, മഹാലക്ഷ്മിയും പാർവ്വതിയും. അതുകൊണ്ട് ഇവരിൽ ആരെ വേണമെങ്കിലും ആരാധിക്കാം.  സാക്ഷാൽ പരാശക്തിയെത്തന്നെ ആരാധിക്കുന്നതിലും വിരോധമില്ല. അശ്വനി മാസത്തിലെ ശുക്ലപക്ഷ പ്രഥമ മുതലാണ് നവരാത്രി ആരംഭിക്കുന്നത്. അതുകൊണ്ട് അന്നു മുതൽ ഒരു മണ്ഡപമാക്കി അതിൽ ദേവിയെ കുടിയിരുത്തി ദൂപദേവി ഭാഗവതം, ദേവി മാഹാത്മ്യം  മുതലായവ വായിക്കുകയും വേണം. 

കോസല ദേശത്തിലെ പരമ ദരിദ്രനായ സുശീലൻ എന്ന വൈശ്വന് ഒരു ബ്രാഹ്മണൻ നവരാത്രി വ്രതവും ദേവീ പൂജയും ഉപദേശിച്ചു കൊടുത്തു.  അദ്ദേഹം അത് കൃത്യമായി അനുഷ്ഠിക്കയാൽ അചിരേണ ദാരിദ്ര്യം മാറി ധനവാനായിത്തിത്തീർന്നു.  സീതാപഹരണം മൂലം ദുഖിതനായ രാമന് നാരദൻ നവരാത്രി വ്രതോപദേശം ചെയ്തു.  അദ്ദേഹം ആ വ്രതം കൃത്യമായി അനുഷ്ടിച്ചു.  തന്മൂലം വാനര സൈന്യത്തിന്റെ സഹായത്തോടു കൂടി ലങ്കയിലെത്തി. രാവണനെ യുദ്ധത്തിൽ വധിക്കുകയും സീതയെ വീണ്ടെടുക്കുന്നതിനും സാധിച്ചു.  ശത്രു സംഹാരം ചെയ്ത് അഭീഷ്ടം കൈവരുത്തുമെന്നുള്ളത് നവരാത്രി വ്രതത്തിന്റെ പ്രത്യേകതയാണ്. 

ദക്ഷിണ ഭാരതത്തിലെ നവരാത്രി കർണ്ണാടകക്കാർക്ക് ദശരാത്രിയാണ്. ബംഗാളികൾക്ക് കാളി പൂജയുമാണ്. ദേവീ മഹിഷാസുരനെക്കൊന്നു ദേവതകൾക്കു സമാധാനമുണ്ടാക്കി കൊടുത്ത ദിവസമാണ് നവരാത്രി എന്നു ചിലർ പറയുന്നു.  ദനൂജരായ രംഭനും കരംഭനും കഠിനമായ തപസ്സു ചെയ്തു കൊണ്ടിരിക്കെ ദേവേന്ദ്രൻ മുതലയായിചെന്ന് കരംഭനെ കൊന്നുകളഞ്ഞു.  കോപാകുലനായ രംഭൻ പിന്നീട് കഠിന തപസ്സു ചെയ്തു.  ഇന്ദ്രലോകം കൈക്കലാക്കി.  ശക്തിയും പ്രഭാവവുമുള്ള ഒരു പുത്രൻ ഉണ്ടാകുന്നതിനുള്ള വരം ബ്രഹ്‌മാവിൽ നിന്നു വാങ്ങി.  അതനുസരിച്ച് രംഭന് മഹിഷിയിലുണ്ടായ പുത്രനാണ് മഹിഷൻ.  അവൻ തപസ്സു ചെയ്തു ബ്രഹ്‌മാവിനെ പ്രത്യക്ഷനാക്കി. ഒരു അബലമൂലമല്ലാതെ മറ്റാരും താൻ മധ്യനല്ലെന്നുള്ള വരം വാങ്ങിക്കൊണ്ടു ദേവലോകത്തെത്തി.  

ഇന്ദ്രനെ യുദ്ധത്തിൽ തോൽപ്പിച്ച് ഇന്ദ്രനായി അവിടെ വാണു.  ദേവന്മാരെല്ലാം അതോടു കൂടി ഓടി ഒളിച്ചു.  സ്വർഗം അസുരന്മാരുടെ നാടായി തീർന്നു. ഒളിച്ചോടിപ്പോയ ഇന്ദ്രൻ പരാശക്തി സ്വരൂപിണിയായി ദേവിയെ ഭജിച്ചു.  ബ്രഹ്മ - വിഷ്ണു - മഹേശ്വരന്മാരുടെയും മറ്റു  ദേവകളുടെയും ശക്തി ഒത്തു ചേർന്നുണ്ടായ ദേവീ ദേവന്മാരിൽ നിന്നും ആയുധത്തിലെത്തി മഹിഷനെ യുദ്ധത്തിൽ വധിക്കുകയും ദേവലോകം ശത്രുബാധയകറ്റി ഇന്ദ്രനു തന്നെ പ്രദാനം ചെയ്യുകയുമുണ്ടായി.  മഹിഷാസുര വധം  നടന്ന ദിവസമാണ് വിജയദശമി.  അതുകൊണ്ട്  ആയുധ പൂജ ഒരു പതിവായി.  മഹിഷപുരമാണ് മൈസൂർ.  

വിജയദശമി ദിവസം മൈസൂർ രാജാവും തിരുവിതാംകൂർ രാജാവും അസ്ത്രവിദ്യ അഭ്യസിക്കാൻ ആഡംബരസഹിതം പോകുന്ന ഒരു ചടങ്ങുണ്ടായിരുന്നു. തൊഴിലാളികൾ അവരവരുടെ പണി ആയുധങ്ങൾ വച്ചു പൂജിക്കുന്നു.  സരസ്വതിയും കാളിയും ലക്ഷ്മിയും എല്ലാം പരാശക്തിയായി ഓരോ നാട്ടുകാർ ഓരോ ദേവിയെ ആരാധിച്ചാലും ഫലം ഒന്ന് തന്നെയാകുന്നു. കർണാടകത്തിൽ ചണ്ഡികാദേവിയെ ആരാധിക്കുമ്പോൾ കേരളത്തിൽ സരസ്വതിയേയും കൊൽക്കത്തയിൽ കാളിയേയും ആരാധിക്കുന്നു. 

ദക്ഷന്റെ  യാഗം മുടക്കി അവനെ വധിച്ച ഭദ്രയുടെ ജന്മദിവസമാണ് ജന്മാഷ്ടമി. ദുർഗാഷ്ടമി, മഹാനവമി, വിജയ ദശമി ഈ മൂന്ന് ദിവസവും ദേവീ പൂജ നടത്തുന്നവർക്ക് ആപത്തുകൾ ഉണ്ടാകുകയില്ല. ദാരിദ്ര്യബാധയും വിട്ടുപോകും. കുട്ടികളെ എഴുത്തിനിരുത്തുന്നത് വിജയ ദശമി ദിവസം വേണമെന്നാണ് കേരളത്തിലെ ആചാരം. 

വൈഷ്ണവർ ശ്രീരാമ വിഗ്രഹം വച്ച് രാമായണ പാരായണം നടത്തുന്നു.  ചിലയിടങ്ങളിൽ രാമലീല ആഘോഷ പൂർവ്വം പലതരം കലാരൂപങ്ങളുടെ നടത്തുന്നു.  തുടർന്ന് ധരാളം ദേവി സ്തോത്രങ്ങൾ ചൊല്ലി ദേവിയെ വണങ്ങുന്നു. ഭാരതീയ ആചാരങ്ങളിൽ അഗ്രീമസ്ഥാനമാണ് നവരാത്രി അനുഷ്ടാനങ്ങൾക്ക് നല്കിപ്പോരുന്നത്. നവരാത്രി അനുഷ്ടാനങ്ങൾ മറ്റെല്ലാ ആചാരങ്ങളെയും പോലെ ആത്മീയ ഗഹനതയിൽ നിന്നും ഉടലെടുക്കുന്നതാണ്.  

ദക്ഷിണേന്ത്യയിൽ ദേവി വിഗ്രഹം ഒമ്പതുഭാവങ്ങളിൽ അല്കരിച്ച് പൂജ നടത്തുന്ന രീതിയുള്ളത്. ഈ ഭാവങ്ങൾ യഥാക്രമം  ശൈലപുത്രി, ബ്രഹ്മചാരിണി, ചന്ദ്രഘണ്ട, കുശ്മാണ്ഡ, സ്കന്ദമാത, കാർത്യായനി, കാലരാത്രി, മഹാഗൗരി, സിദ്ധിദാത്രി ഇവരാകുന്നു.  വിജയദശമി ദിനത്തിലെ വിദ്യാരംഭം അതിപ്രാധാന്യമുള്ള ഒരു ചടങ്ങാകുന്നു.  കുട്ടികളെ വിദ്യാരംഭം ചെയ്യിക്കുന്നതിന് ജ്ഞാനികളായ സാധകരാണ് വേണ്ടത്. അല്ലാതെ ധനികരോ, പ്രശസ്തരോ അല്ല. യമനിയമാദി സാധനകളാൽ നമ്മുടെ ഉള്ളിലുള്ള ആത്മചൈതന്യത്തെ ഉണർത്തിയാണ് യഥാർത്ഥ സാധകർ.  

മന്ത്രസിദ്ധരായ സാധകർക്ക്  ഉള്ളിലുള്ള പ്രാണശക്തിയുടെ പ്രവാഹം വളരെ ഉയർന്നതായിരിക്കും.  സകല ജീവജാലങ്ങളിലും  ഉള്ളിൽ ലയിക്കുന്ന ജീവശക്തി തന്നെയാണ്. എന്നാൽ ശാസ്ത്രീയ സാധനാ  മാർഗങ്ങളിലൂടെയും  യമ, നിയമങ്ങൾ, പ്രാണായാമം, കുണ്ഡലിനിയോഗ തുടങ്ങിയ അനുഷ്ഠാനങ്ങളിലൂടെയും തന്നിലെ പ്രാണശക്തിയെ പൂർണ്ണത വരുത്തിയവർ വിദ്യാദീക്ഷയുടെ ആചാര്യൻമാരായാൽ വിദ്യ ലഭിക്കുന്ന കുട്ടികൾ വലിയ പണ്ഡിതരും സമർത്ഥരുമായിത്തീരുന്നു. 

പ്രകൃതിയോട് തിന്മീയഭാവം പ്രാപിക്കുന്ന ശക്തിയാണ് ദേവി. ദേവി സക്ഷാൽ പ്രകൃതി തന്നെയാകുന്നു.  വിജയദശമി ദിനത്തിലെ വിദ്യാദീക്ഷയിലൂടെ ഒരു വ്യക്തി പ്രപഞ്ച വിജ്ഞാനത്തിന് തന്നെയാണ് തുടക്കം കുറിക്കുന്നത്.  ലളിത സഹസ്രനാമത്തിൽ ദേവിയെ വിശ്വമാതാ ജഗദ്ധാതീ എന്ന് വിശേഷിപ്പിക്കുന്നു. സകല പ്രപഞ്ചത്തിനും മാതാവും ലോകത്തെ തന്റെയുള്ളിൽ ധരിച്ചിരിക്കുന്നവളുമാണ് ദേവി. 

സർവ്വാഭിഷ്ടസിദ്ധി, സർവ്വവശീകരണം  ഈ ലക്ഷ്യങ്ങൾ ത്രിപുരസുന്ദരീ പൂജയിലൂടെ  സാധ്യമാകുന്നു.  സർവ്വവിധ സമൃദ്ധിയും ലഭിക്കുന്നതിന് അഷ്ടലക്ഷ്മീ പൂജ ഉത്തമമാണ്.  വിവാഹ ലബ്ധിക്ക് മംഗളഗൗരി പൂജ, ശത്രുദോഷ ശാന്തിക്ക് മഹാപ്രതൃംഗിരാപൂജ തുടങ്ങി വിവിധങ്ങളായ ദേവീ ആരാധനാ കർമ്മങ്ങൾ നവരാത്രികാലത്ത് ഭക്തരുടെ ആവശ്യാർത്ഥം നടത്തുന്നത് അതീവ ഫലപ്രദമാകുന്നു. 

ഭാരതീയ സമൂഹത്തിന്റെ ഒരു വർഷക്കാലമുള്ള  വിവിധ ആചാരങ്ങളിൽ ഏറ്റവും പ്രാധാന്യത്തോടെ രാജ്യമെങ്ങും ആചരിക്കപ്പെടുന്നത് നവരാത്രിയാണ്.  ഇത് വിദ്യാവിനിമയത്തിന്റെ പ്രധാന്യത്തെ കാണിക്കുന്നു.  ജ്ഞാനപ്രകാശത്തിന്റെ ദീപ്തി ദേശാന്തരങ്ങളിൽ വ്യാപിക്കുന്ന ദിനമാണ് വിജയദശമി.  അജ്ഞാനവും മൂഢതയുമാകുന്ന മഹിഷത്തിനു മേൽ വിശ്വമാതാവായി വിദ്യനേടിയ വിജയത്തിന്റെ ദിനം.

 

നവരാത്രിക്കാലത്ത് ജ്ഞാനദായനിയും മുക്തിദായിനിയും ശത്രുനാശിനിയുമായ ദുർഗ്ഗയെ പൂജിക്കുന്നത് സവിശേഷത നിറഞ്ഞതാണ്.  മഹാകാളി, മഹാലക്ഷ്മി, മഹാസരസ്വതി,  എന്നിവരുടെ ചൈതന്യങ്ങൾ ഒന്നാകുന്ന മൂർത്തിയാണ് ദുർഗ്ഗാഭഗവതി അതിനാൽ നവരാത്രിക്കാലത്ത് ദുർഗ്ഗാപൂജയുടെ  പ്രാധാന്യം വർദ്ധിക്കുന്നു.  ഈ പുണ്യദിനമാണ് നവരാത്രിയായി ആഘോഷിക്കുന്നത്. 

അഹങ്കാരിയായ ദക്ഷനെ ഇല്ലാതാക്കാൻ കാളി അവതരിച്ചത് അഷ്ടമി നാളിലായിരുന്നു.  ശ്രീരാമൻ പരാശക്തിയെ പൂജിച്ചു പ്രാർത്ഥിച്ചു.  ദേവി അഷ്ടമി ദിവസം പ്രത്യക്ഷപ്പെട്ട് വരം നൽകിയെന്നും രാമരാവണ യുദ്ധത്തിൽ വിജയം നേടിയത് വിജയദശമി ദിനത്തിലാണെന്നും ഐതിഹ്യമുണ്ട്.  നവരാത്രി പൂജയിലൂടെ ശക്തിയാർജിച്ചാണ് അർജ്ജുനൻ വിജയം വരിച്ചത്.