തൃശൂരിൽ തീ പിടിച്ച ബസ് തനിയെ ഓടി മറ്റൊരു ബസിൽ ഇടിച്ചു
തൃശൂർ: ശക്തൻ സ്റ്റാൻഡിൽ ട്രാക്കിൽ നിർത്തിയിട്ടിരുന്ന സ്വകാര്യ ബസിനു തീപിടിച്ചു. സമീപത്തെ ട്രാക്കിൽ നിർത്തിയിട്ടിരുന്ന ബസുകളിലെ ഫയർ ഡിസ്റ്റിംഗ്വിഷറും വെള്ളവും ഉപയോഗിച്ചു ബസ് ഡ്രൈവറും മറ്റു ബസുകളിലെ ജീവനക്കാരും ചേർന്ന് തീയണച്ചു.
ഇന്നു രാവിലെ ആറരയോടെയായിരുന്നു സംഭവം. ബസിൽ യാത്രക്കാർ ഉണ്ടായിരുന്നെങ്കിലും പുക ഉയരുന്നതുകണ്ട് ബസ് ജീവനക്കാർ ആളുകളെ അതിവേഗം വാഹനത്തിൽനിന്നു പുറത്തിറക്കിയതിനാൽ ആളപായം ഉണ്ടായില്ല. തീപിടിത്തത്തെത്തുടർന്നു ബസ് കുറച്ചുദൂരം മുന്നോട്ടുപോയത് ആശങ്ക പരത്തി. മറ്റൊരു ബസിൽ ഇടിച്ചാണ് ബസ് നിന്നത്. തുടർന്ന് ഫയർഫോഴ്സ് എത്തിയപ്പോഴേക്കും തീ അണച്ചിരുന്നു.
തൃശൂർ- കൊടുങ്ങല്ലൂർ റൂട്ടിലോടുന്ന സന്തോഷം ബസിനാണു തീപിടിച്ചത്. ഷോർട്ട് സർക്യൂട്ടാണു തീപിടിത്തത്തിനു കാരണമെന്നു സ്ഥലത്തെത്തിയ ഫയർഫോഴ്സ് ഉദ്യോഗസ്ഥർ പറഞ്ഞു. ബസിന്റെ വയറിംഗ് കിറ്റ് പൂർണമായും കത്തിനശിച്ചു.
Leave A Comment