കാർ കിണറ്റിലേക്ക് മറിഞ്ഞ് ഗൃഹനാഥൻ മരിച്ചു, മകന് ഗുരുതര പരിക്ക്
കണ്ണൂർ: കരുവഞ്ചാൽ ആലക്കോട് നെല്ലിക്കുന്നിൽ നിയന്ത്രണം വിട്ട കാർ ആൾമറ തകർത്ത് കിണറ്റിൽ വീണ് ഗൃഹനാഥൻ മരിച്ചു. മകന് ഗുരുതരം. ആലക്കോട് നെല്ലിക്കുന്ന് താരാമംഗലത്തെ മാത്തുക്കുട്ടി (55) ആണ് മരിച്ചത്. പരിക്കേറ്റ മകൻ ബിൻസിനെ (18) ഗുരുതരാവസ്ഥയിൽ ആലക്കോട് സഹകരണ ആശുപത്രിയിൽ പ്രവേശിപ്പിച്ചു.
ഇന്നു രാവിലെ 10.20 ഓടെയായിരുന്നു അപകടം. പുറത്തേക്ക് പോകാനായി വീട്ടുമുറ്റത്ത് നിർത്തിയിട്ട കാർ തിരിക്കുന്നതിനിടയിൽ നിയന്ത്രണം വിട്ട് കിണറ്റിന്‍റെ ആൾമറ തകർത്ത് താഴേക്ക് പതിക്കുകയായിരുന്നു.
മാനന്തവാടി രൂപതയുടെ പ്രഥമ സഹായമെത്രാനായ മാർ അലക്സ് താരമംഗലത്തിന്‍റെ സഹോദരനാണ് മരിച്ച മാത്തുക്കുട്ടി. സംഭവമറിഞ്ഞ് ഓടിക്കൂടിയ സമീപവാസികളും ആലക്കോട് പോലീസും ചേർന്നാണ് കിണറ്റിൽ വീണ കാറിൽ അകപ്പെട്ടവരെ പുറത്തെടുത്തത്.
ഈ സമയം മാത്തുക്കുട്ടിക്ക് ജീവനുണ്ടായിരുന്നുവെന്ന് പറയുന്നു. ആശുപത്രിയിൽ കൊണ്ടുപോകും വഴിയായിരുന്നു മരണം. എന്നാൽ കാറിൽ കുടുങ്ങിക്കിടന്ന ബിൻസിനെ ഏറെ നേരത്തെ പരിശ്രമത്തിനൊടുവിലാണ് പുറത്തെടുക്കാനായത്. അവശ നിലയിലായ ബിൻസ് ആശുപത്രിയിൽ ചികിത്സയിലാണ്.
Leave A Comment