തെറ്റ് ചെയ്തിട്ടില്ല: അവസരങ്ങളുണ്ടായിട്ടും അഴിമതി ചെയ്തിട്ടില്ല: കെ.സുധാകരന്
കൊച്ചി: മനസറിഞ്ഞുകൊണ്ട് താനൊരു കുറ്റവും ചെയ്തിട്ടില്ല; ചെയ്കയുമില്ലെന്ന് കെപിസിസി അധ്യക്ഷന് കെ. സുധാകരന്. മോന്സണ് മാവുങ്കല് പുരാവസ്തു തട്ടിപ്പിലെ കളളപ്പണക്കേസില് എന്ഫോഴ്സ്മെന്റ് ഡയറക്ട്രേറ്റിന് മുന്നില് ഹാജരാകാന് പോകും മുന്പ് മാധ്യമങ്ങളോട് സംസാരിക്കുകയായിരുന്നു അദ്ദേഹം.
അഴിമതി നടത്തണമെങ്കില് തനിക്ക് പണ്ടേ ആകാമായിരുന്നു. വനം മന്ത്രി ആയിരുന്നപ്പോള് പോലും ഒരു രൂപയുടെ അഴിമതി നടത്തി എന്ന ആക്ഷേപം തനിക്കെതിരേ ഉയര്ന്നിട്ടില്ലെന്ന് അദ്ദേഹം ചൂണ്ടിക്കാട്ടി.
നിലമ്പൂര് കോവിലകത്തിന്റെ മരം മുറിക്കണമെന്ന ആവശ്യവുമായി ചിലര് കോടികളുമായി വന്നപ്പോഴും താന് അത് ചെയ്തില്ല. കോടികള് ഉണ്ടാക്കണമെങ്കില് ഇതിനകം നിരവധി സന്ദര്ഭങ്ങള് വന്നു. എന്നാല് അന്യന്റെ കാശ്കൊണ്ട് താന് ജീവിച്ചിട്ടില്ലെന്ന് അദ്ദേഹം വ്യക്തമാക്കി.
ഇഡിക്ക് മുന്നില് ഹാജരാകുന്നതില് യാതൊരു ആശങ്കയും ഇല്ലെന്നും അദ്ദേഹം പറഞ്ഞു.
പുതുപ്പള്ളി ഉപതെരഞ്ഞെടുപ്പില് യുഡിഎഫ് ചരിത്രത്തില് റിക്കാര്ഡ് സൃഷ്ടിച്ചുള്ള ഭൂരിപക്ഷം നേടുമെന്നും സുധാകരന് അവകാശപ്പെട്ടു.
മോന്സണ് മാവുങ്കല് പുരാവസ്തു തട്ടിപ്പിലെ കളളപ്പണക്കേസില് കെ.സുധാകരന് കൊച്ചിയിലെ ഇഡി ഓഫീസിലാണ് ഹാജരാവുക. മോന്സനുമായുളള സാമ്പത്തിക ഇടപെടലാണ് ചോദിച്ചറിയുക.
മോന്സണ് മാവുങ്കലിന്റെ കലൂരിലെ വീട്ടില് വെച്ച് സുധാകരന് 10 ലക്ഷം രൂപ കൈപ്പറ്റിയെന്ന് മോന്സന്റെ മുന് ജീവനക്കാരന് ജിന്സണ് മൊഴി നല്കിയിരുന്നു. 2018 നവംബറിലായിരുന്നു പണം കൈമാറിയതെന്ന് കേസിലെ പരാതിക്കാരായ അനൂപ് അഹമ്മദും മൊഴി നല്കിയിട്ടുണ്ട്. ഇതടക്കമുള്ള സാമ്പത്തിക ഇടപാടിലാണ് ഇഡി അന്വേഷണം.
നേരത്തെ, പുരാവസ്തു തട്ടിപ്പ് കേസില് സുധാകരനെ ക്രൈംബ്രാഞ്ച് അറസ്റ്റ് ചെയ്ത് വിട്ടയച്ചിരുന്നു.10 കോടിയുടെ തട്ടിപ്പുകേസിലാണ് സുധാകരനെ അറസ്റ്റ് ചെയ്ത് വിട്ടയച്ചത്.
Leave A Comment