അധികാരത്തിലിരിക്കുന്നവർക്ക് സ്വഭാവശുദ്ധി വേണം: ജി.സുധാകരൻ
ആലപ്പുഴ: രാഷ്ട്രീയത്തിലുള്ളവർക്കും അധികാരസ്ഥാനങ്ങളിൽ ഇരിക്കുന്നവർക്കും വേണ്ടത് സ്വഭാവശുദ്ധിയാണെന്ന് മുതിർന്ന സിപിഎം നേതാവ് ജി. സുധാകരൻ. സ്വഭാവശുദ്ധിക്ക് വിലയില്ലാത്ത കാലമാണിതെന്നും സുധാകരൻ പറഞ്ഞു.
മുൻ എംഎൽഎ കെ.കെ രാമചന്ദ്രൻ നായരുടെ അനുസ്‌മരണ സമ്മേളനം ഉദ്ഘാടനം ചെയ്ത‌ത് സംസാരിക്കുകയായിരുന്നു സുധാകരൻ. രാഷ്ട്രീയത്തിലുള്ളവരുടെ ലക്ഷ്യം സ്ഥാനമാനങ്ങളും പ്രോട്ടോകോളുമാണ്. പ്രോട്ടോകോൾ സർക്കാർ പരിപാടിയിൽ മാത്രമുള്ളതാണെന്നും സുധാകരൻ കൂട്ടിച്ചേർത്തു.
ഒരു സാംസ്‌കാരിക സ്ഥാപനത്തിൻ്റെ ഉദ്ഘാടനത്തിന് അതേക്കുറിച്ച് ഒന്നുമറിയാത്ത നേതാവിനായിരിക്കും പരിഗണന. സ്ഥാപനം പടുത്തുയർത്താൻ കഷ്ടപ്പെട്ട സാംസ്‌കാരിക പ്രവർത്തകന് അവിടെ പരിഗണനയില്ല.
പണ്ട് ഇങ്ങനെയായിരുന്നില്ല. സംസാരിക്കാൻ ഒഴിഞ്ഞു കൊടുക്കുമായിരുന്നു ഈ സാഹചര്യത്തിലാണ് കെ.കെ. രാമചന്ദ്രൻ നായരുടെ മഹത്വം തിരിച്ചറിയേണ്ടത്. അദ്ദേഹത്തിന്റെ ഏറ്റവും വലിയ കൈമുതൽ സ്വഭാവശുദ്ധിയായിരുന്നുവെന്നും സുധാകരൻ ചൂണ്ടിക്കാട്ടി
രാഷ്ട്രീയത്തെ വഴിതെറ്റിക്കുന്നത് പൊളിറ്റിക്കൽ ക്രിമിനൽസ് ആണെന്നും സുധാകരൻ വിമർശിച്ചു. മാധ്യമങ്ങൾക്കെതിരെയും സുധാകരൻ വിമർശനം ഉന്നയിച്ചു.
സാമൂഹിക വിമർശനങ്ങളെ തകർക്കുന്ന മാധ്യമ സാംസ്‌കാരമാണ് ഇപ്പോളുള്ളത്. പറയാത്ത കാര്യങ്ങളാണ് അച്ചടിച്ച് വരുന്നത്. എല്ലാ മാധ്യമപ്രവർത്തകരും ഇങ്ങനെയാണെന്ന അഭിപ്രായമില്ല. ഈ രീതിയിലുള്ള മാധ്യമപ്രവർത്തനം മാറേണ്ടതുണ്ടെന്നും സുധാകരൻ പറഞ്ഞു.
Leave A Comment