വായ്പ തിരിച്ചടക്കാതിരുന്നാൽ ഇനി ഗുണ്ടകളെത്തില്ല ; കർശന നടപടിയുമായി ആർ.ബി.ഐ
ന്യൂഡെല്‍ഹി: വായ്പ തിരിച്ചുപിടിക്കാന്‍ ധനകാര്യ സ്ഥാപനങ്ങള്‍ സ്വീകരിക്കുന്ന തെറ്റായ പ്രവണതകള്‍ക്കെതിരെ കര്‍ശന നടപടികളുമായി ആര്‍ബിഐ.
വായ്പകള്‍ തിരിച്ചുപിടിക്കുന്ന ഏജന്റുമാരെ നിയന്ത്രിക്കുകയാണ് ആര്‍.ബി.ഐ ലക്ഷ്യം. ഡെലിവറി ഏജന്റുമാര്‍ക്കെതിരായ പരാതികള്‍ വ്യാപകമാകുന്നതിനിടെയാണ് നീക്കം. വായ്പ തിരിച്ചുപിടിക്കാന്‍ ധനകാര്യ സ്ഥാപനങ്ങളെ സഹായിക്കുന്ന ഏജന്‍റുമാര്‍ ആളുകളെ ഉപദ്രവിക്കുകയോ ഭീഷണിപ്പെടുത്തുകയോ ചെയ്യുന്നില്ലെന്ന് ഉറപ്പാക്കണമെന്നാണ് ആര്‍.ബി.ഐ നിര്‍ദേശം. വാക്കുകള്‍ കൊണ്ടോ ശാരീരികമായോ വായ്പയെടുത്തവര്‍ക്ക് ഒരുതരത്തിലുമുള്ള ബുദ്ധിമുട്ടുണ്ടാവരുതെന്നും ആര്‍.ബി.ഐ വ്യക്തമാക്കുന്നു.
ബാങ്കുകളും ബാങ്കിങ്ങിതര ധനകാര്യ സ്ഥാപനങ്ങളും ഏജന്റുമാരെ ജോലിക്കുവെക്കുമ്പോള്‍ വായ്പയെടുത്തവരെ പൊതുഇടങ്ങളിലും കുടുംബാംഗങ്ങളുടേയും സുഹൃത്തുക്കളുടേയും മുന്നില്‍ അപമാനിക്കാന്‍ പാടില്ലെന്ന കര്‍ശന നിര്‍ദേശം നല്‍കണം. മൊബൈല്‍, സമൂഹമാധ്യമങ്ങള്‍ എന്നിവയിലൂടെ അനാവശ്യ മെസേജുകള്‍ അയക്കുന്നതും ഇത്തരക്കാര്‍ ഒഴിവാക്കണം.
രാവിലെ എട്ട് മണിക്ക് മുമ്പും രാത്രി ഏഴ് മണിക്ക് ശേഷവും വായ്പയെടുത്തവരെ തിരിച്ചടവ് ഓര്‍മിപ്പിക്കാന്‍ വിളിക്കരുത്. ഈ ചട്ടങ്ങളുടെ ലംഘനമുണ്ടായാല്‍ അത് ഗുരുതര കുറ്റകൃത്യമായി കണ്ട് കര്‍ശന നടപടിയുണ്ടാകുമെന്നും ആര്‍.ബി.ഐ ഇതുസംബന്ധിച്ച വിജ്ഞാപനത്തില്‍ സൂചിപ്പിക്കുന്നു.
Leave A Comment