വെറ്റിലപ്പാറയിൽ ഒറ്റയാന്റെ പരാക്രമം; വീടുകൾക്ക് നേരെ ആക്രമണ ശ്രമം
ചാലക്കുടി: വെറ്റിലപ്പാറ പതിനേഴാം ബ്ലോക്കിൽ പ്ലാന്റേഷൻ ക്വാർട്ടേഴ്സുകൾക്ക് നേരെ പട്ടാപ്പകൽ ഒറ്റയാന്റെ ആക്രമണശ്രമം. ഇന്നലെ ഉച്ചയ്ക്ക് രണ്ടുമണിയോടെയാണ് പ്ലാന്റേഷൻ ക്വാർട്ടേഴ്സിലെ താമസക്കാരായ ജിജോ, മുരളി എന്നിവരുടെ വീടിന് നേരെയാണ് കാട്ടാനയുടെ ആക്രമണശ്രമം ഉണ്ടായത്.
പ്ലാന്റേഷൻ തോട്ടത്തിലെ വട്ടക്കാടിൽ നിന്നും ആന ഇറങ്ങിവരുന്നത് കണ്ടു ആളുകൾ ഓടി രക്ഷപ്പെടുകയായിരുന്നു. തുടർന്ന്ആന കോട്ടേഴ്സിന് സമീപം കെട്ടിയിരുന്ന പശുവിനെ ആക്രമിക്കാൻ ശ്രമിക്കുകയും കുടിവെള്ള വിതരണത്തിനായുള്ള പൈപ്പ് ചവിട്ടി പൊട്ടിക്കുകയും ചെയ്തു.
പിന്നീട് കോട്ടേഴ്സിന് നേരെ വന്ന ആനയെ ആളുകൾ ഒച്ചവെച്ചും പടക്കം പൊട്ടിച്ചും തുരത്തുകയായിരുന്നു ഭാഗ്യം കൊണ്ട് മാത്രമാണ് കാട്ടാനയുടെ ആക്രമണത്തിൽ നിന്നും ഇവർ തലനാരിഴക്ക് രക്ഷപ്പെട്ടത്. കോട്ടേഴ്സിന്റെ പുറകുവശത്തുകൂടി വന്ന ആനയെ കണ്ടു പട്ടി കുരച്ചതുകൊണ്ട് മാത്രമാണ് ആളുകൾ കണ്ടതും കുട്ടികൾ അടക്കമുള്ളവർക്ക് ഓടി രക്ഷപെടാൻ സാധിച്ചതും.
ക്വാർട്ടേഴ്സ് പരിസരത്ത് ഒറ്റയാന്റെ ശല്യം പതിവായിരിക്കുകയാണെന്നും കുട്ടികൾ അടക്കമുള്ളവർ പേടിയോടെയാണ് ഓരോ ദിനവും കഴിഞ്ഞുകൂടുന്നതെന്നുംനാട്ടുകാർ പറഞ്ഞു .
കാട്ടാനകളുടെ ആക്രമണം പ്രദേശവാസികൾക്ക് ഉണ്ടാകാതിരിക്കാൻ ശാശ്വതമായ പരിഹാരം വേണമെന്ന് നാട്ടുകാർ ആവശ്യപ്പെട്ടു.
Leave A Comment