സിനിമയിൽ ലഹരി ഉപയോഗമുണ്ട്; ഭയം കാരണം മകനെ അഭിനയിക്കാൻ വിട്ടില്ല: ടിനി ടോം
തിരുവനന്തപുരം: സിനിമാ മേഖലയില്‍ ലഹരി ഉപയോഗമുണ്ടെന്നും ഈ ഭയം കാരണം മകനെ സിനിമയില്‍ അഭിനയിക്കാന്‍ വിട്ടില്ലെന്നും നടന്‍ ടിനി ടോം. കേരള സര്‍വകലാശാല യുവജനോത്സവം ഉദ്ഘാടന വേദിയില്‍ സംസാരിക്കുകയായിരുന്നു അദ്ദേഹം.
സിനിമാ സെറ്റുകളിലെ ലഹരി ഉപയോഗം കാരണമാണ് ഒരു പ്രമുഖ നടന്‍റെ മകനായി അഭിനയിക്കാന്‍ അവസരം ലഭിച്ചിട്ടും തന്‍റെ മകനെ സിനിമയില്‍ വിടാന്‍ ഭാര്യ അനുവദിക്കാതിരുന്നതെന്നും ടിനി ടോം പറഞ്ഞു.
17-18 വയസിലാണ് കുട്ടികള്‍ വഴി തെറ്റുന്നത്. എനിക്ക് ഒരു മകനേയുള്ളു. യുവാക്കളെ നശിപ്പിക്കുന്ന മഹാമാരിയാണ് ലഹരി. ഇതിനെതിരേ യുവാക്കളാണ് മുന്നില്‍ നില്‍ക്കേണ്ടത്.
ലഹരിക്ക് അടിമയായ ഒരു നടനെ ഈയിടെ കണ്ടു. അദ്ദേഹത്തിന്‍റെ പല്ലുകൾ പൊടിഞ്ഞു തുടങ്ങി. ലഹരി ഉപയോഗിക്കുന്നതു കൊണ്ട് അദ്ദേഹം നന്നായി അഭിനയിക്കുന്നുണ്ടെന്നു പലരും പറയുന്നു. ഇപ്പോൾ പല്ല് , അടുത്തത് എല്ലു പൊടിയും. അതു കൊണ്ടു കലയാകണം നമുക്ക് ലഹരി– ടിനി ടോം പറഞ്ഞു.
ലഹരിക്കെതിരായ പോലീസിന്‍റെ "യോദ്ധാവ്' ബോധവല്‍ക്കരണ പരിപാടിയുടെ അംബാസഡര്‍ കൂടിയാണ് ടിനി ടോം.
Leave A Comment