ഇന്ന് ഐക്യ കേരളപ്പിറവി ദിനം. നാട്ടു രാജ്യങ്ങളുടെ സംയോജനത്തിലൂടെ കേരളം ജന്മമെടുത്തിട്ട് 67  വർഷം തികയുന്നു. തിരുവിതാംകൂർ ഭരണത്തിന്റെ ഓർമ്മയുണർത്തുന്ന അപൂർവ്വ ശേഷിപ്പുകൾ പുത്തൻ ചിറയിലൂടെ സഞ്ചരിക്കുക. കരിങ്ങാച്ചിറയിലെ അഞ്ചൽപ്പെട്ടിയും പോലീസ് ഔട്ട് പോസ്റ്റായിരുന്ന കെട്ടിടവും പഴയകാലത്തിന്റെ സ്‌മരണയുണർത്തി ഇവിടെ ഇപ്പോഴും നില കൊള്ളുന്നു. ചരിത്ര വിദ്യാർഥികൾ ഇന്നും നിരന്തരമായി സന്ദർശിക്കുകയും  ഇതേക്കുറിച്ച് പഠിച്ചു കൊണ്ടിരിക്കുകയും ചെയ്യുന്നു. പഴമയിലധിഷ്ഠിതമായ ചരിത്ര സത്വങ്ങൾ പൈതൃക കാഴ്ചയിലെ നേർ രേഖകളായി ഇപ്പോഴും അവശേഷിക്കുന്നു. 

പൗരാണിക കാലത്തുണ്ടായിരുന്ന അഞ്ചൽ സമ്പ്രദായത്തിന്റെ അനുഭവ സമ്പത്ത് പുതു തലമുറക്ക് അദ്‌ഭുത കഥകളായി മാറിയേക്കാം. കൊച്ചി രാജ്യത്തെ കരിങ്ങാച്ചിറയിലും പരിസര പ്രദേശങ്ങളുമുൾപ്പെട്ട പുത്തൻ ചിറ വില്ലേജ് മാത്രം മുൻപ് തിരുവിതാംകൂറിന്റേതായിരുന്നു. കാലത്തോട് മല്ലടിച്ച കൗതുകം പോലെയാണ് തപാൽ മുത്തശ്ശി എന്ന് വിശേഷിപ്പിക്കുന്ന അഞ്ചൽപ്പെട്ടി നിൽക്കുന്നത്. നാട്ടു രാജ്യങ്ങൾക്കിടയിൽ നില നിന്നിരുന്ന കത്തിടപാടുകളുടെ പഴയ രൂപമാണ് അഞ്ചൽ. 

ഈ വാഹന സംവിധാനം 1812 മുതൽ നില നിന്നിരുന്നതായി പറയപ്പെടുന്നു. കേണൽ മൺട്രോയാണ് ഈ സന്ദേശ വാഹക ഏർപ്പാടിന് ഔദ്യോഗികമായി അഞ്ചൽ എന്ന് നാമകരണം നടത്തിയത്. സർക്കാർ ആവശ്യത്തിന് മാത്രമായിട്ടായിരുന്നു 1848  വരെ ഈ സമ്പ്രദായം .

ഉത്രം തിരുനാൾ മഹാരാജാവിന്റെ കാലത്ത് കുടിയാന്മാരായവർ  അയക്കുന്ന സർക്കാർ ഹർജികളും സർക്കാർ ജീവനക്കാരുടെ കത്തുകളും അഞ്ചൽ വഴി കൂലി കൊടുക്കാതെ അയക്കാൻ ഉത്തരവുണ്ടായി. ഇതിനെ തുടർന്ന് പൊതു ജനങ്ങൾക്കും അഞ്ചലിന്റെ ഗുണം കിട്ടി തുടങ്ങി. 

മൺട്രോസായിപ്പ്  1818 ലാണ് അഞ്ചലിന് രൂപം നൽകിയത്. കൊച്ചി രാജ്യത്ത് അഞ്ചൽ വകുപ്പ് ഉദ്‌ഘാടനം ചെയ്യപ്പെടുന്നത് തോട്ടക്കാട്  ശങ്കുണ്ണി മേനോൻ ദിവാനായിരുന്ന കാലത്താണ്. അതിനു മുൻപാണ് തിരുവിതാം കൂറിലെ പുത്തൻ ചിറയിൽ ഈ ഏർപ്പാട് കടന്നു വന്നത്. ദൂരമോ കനമോ നോക്കാതെ ഒരു ചക്രം ആയിരുന്നു അഞ്ചൽ കൂലി.

 അഞ്ചൽ റെഗുലേഷൻ ആക്ട് 1889 ൽ നിലവിൽ വന്നു

ദിവാൻ സാർ ടി മാധവ നായരുടെ കാലത്താണ് ഉരുപ്പടികൾക്കു കൂലി നിരക്ക് ഏർപ്പെടുത്തിയത്. തിരുവിതാംകൂറിലെ ആദ്യത്തെ അഞ്ചലാപ്പീസ് 1854 ൽ നിലവിൽ വന്നു. ഇതിനു ശേഷം തിരുവനന്തപുരം ചെറുവട്ടൂർ തപാൽ വള്ളവും ആരംഭിച്ചു. അഞ്ചലിന് പ്രാധാന്യമേറിയതോടെ അഞ്ചൽ റെഗുലേഷൻ ആക്ട് 1889 ൽ നിലവിൽ വന്നു.

അഞ്ചലോട്ട ക്കാരന്റെ ഔദ്യോഗിക വേഷ വരവ് ഈ നിയമത്തോടെയായിരുന്നു. തപാൽ ഉരുപ്പിടികളുള്ള തോൾ സഞ്ചിയുമായി ഒരറ്റം വാർത്തു കെട്ടിയ മുനയുള്ളതും ശംഖു മുദ്ര

പഠിപ്പിച്ചതും മണി ഘടിപ്പിച്ചതുമായ ഇരുമ്പു ദണ്ഡ് പിടിച്ച് മണി കെട്ടിയ അരപ്പട്ട ധരിച്ച് ഓടുന്നയാളിനെ അഞ്ചലോട്ടക്കാരൻ അധവാ ജയിൽ റണ്ണർ എന്നും ഉരുപ്പടികൾ ഏറ്റു  വാങ്ങി ഓഫീസിൽ ഏൽപ്പിക്കുന്നയാളിനെ അഞ്ചൽപിള്ള അഥവാ  അഞ്ചൽ മാസ്റ്ററെന്നും വിളിച്ചു. അഞ്ചലോട്ടക്കാരന്റെ വഴി തടയാതെ മാത്രം മറ്റാരും സഞ്ചരിക്കാവൂ എന്ന സർക്കാർ നിർദേശവുമുണ്ടായിരുന്നു. 

എഴുത്തോലക്കു പകരം കടലാസ് ഉപയോഗിക്കണമെന്ന നിയമം 1870 ൽ നടപ്പിലായി. സഞ്ചാര യോഗ്യരായ റോഡുകളോ വാഹനങ്ങളോ ഇല്ലാതിരുന്ന അക്കാലത്ത് തന്നെയാണ് അഞ്ചലോട്ടക്കാരൻ സഹന സേവാ മനോഭാവത്തോടെ ഈ കൃത്യം നിർവ്വഹിച്ചിരുന്നത്. 

പുത്തൻചിറ ഗ്രാമത്തിലെ കിഴക്കും മുറിയിലാണ് അഞ്ചലാപ്പീസ് പ്രവൃത്തിച്ചിരുന്നത്. ഇരിങ്ങാലക്കുട റെയിൽവേ സ്റ്റേഷനിലെത്തുന്ന തപാൽ ഉരുപ്പിടികൾ ഇവിടെയായിരുന്നു എത്തിയിരുന്നത്. പുത്തൻചിറയുടെ വിളിപ്പാടകലെയുള്ള മാളയിലേക്ക് കത്തുകളുമായി അഞ്ചലോട്ടക്കാരൻ നേരിട്ടെത്തിയിരുന്നില്ല. താലൂക്ക് ആസ്ഥാനമായിരുന്ന പറവൂർക്ക് അല്ലെങ്കിൽ അങ്കമാലിയിലേക്ക്  മാത്രം. അവിടെ നിന്ന് മാളയിലേക്ക് മൂന്ന് പോലീസ് ഉദ്യോഗസ്ഥരാണ് ഇവിടുത്തെ ഔട്ട് പോസ്റ്റിലുണ്ടായിരുന്നത്. 

 പുത്തൻചിറ തിരുവിതാംകൂറിലായതിന്റെ ചരിത്രം

കരിങ്ങാച്ചിറ ചരക്കു ഗതാഗതത്തിന്റെ പ്രധാന സിരാ കേന്ദ്രമായിരുന്നു. ചുങ്കം പിരിക്കുന്ന ചൗക്കയും ഇവിടെ ഉണ്ടായിരുന്നു. കെട്ട് വള്ളങ്ങളുടെ നിര കൊണ്ടും ആൾ തിരക്ക് കൊണ്ടും രാവും പകലും തിരക്ക് നിറഞ്ഞതായിരുന്നു. തിരുകൊച്ചി അതിർത്തി ദേശമായിരുന്ന ഈ ചിറയിലെ വഞ്ചിപ്പാട്ടിന്റെ ഈണവും റാന്തലുകളുടെ അരങ്ങു വെളിച്ചവും പഴമക്കാരുടെ മനസ്സിൽ ഇപ്പോഴുമുണ്ട്.

ഇന്ന് പുത്തൻചിറയിൽ തിരുവിതാംകൂർ ദേവസ്വം ഭരണത്തിനു കീഴിലുള്ള ക്ഷേത്രങ്ങളുമുണ്ട്. ദേവ്സ്വം സബ് ഓഫീസും പ്രവർത്തിക്കുന്നു. തിരുവിതാംകൂറിന്റെ പ്രവൃത്തിക്കച്ചേരി തൃചക്രപുരം ക്ഷേത്രത്തിന് സമീപത്തായിരുന്നു പുത്തൻചിറയിൽ  തിരുകൊച്ചി എന്ന് നാമകരണം നടത്തിയിട്ടുള്ള അതിർത്തിക്കല്ലുകളുമുണ്ട്.

പുത്തൻചിറ തിരുവിതാംകൂറിലായതിന്റെ ചരിത്രം കൂടി കേൾക്കാം. എ ഡി 1761 ൽ സാമൂതിരിയുമായുള്ള യുദ്ധത്തിൽ തിരുവിതാംകൂർ കൊച്ചി സൈന്യത്തിന് നേതൃത്വം നൽകിയത് ദളവ അയ്യപ്പ മാർത്താണ്ഡ വർമ്മയും ഡച്ച് സായിപ്പ് ഡി നലോയുമായിരുന്നു. കൊച്ചിരാജാവും മന്ത്രിയുമായിരുന്ന പാലിയത്തച്ചനും അവർക്ക് പിന്തുണ നൽകി. സാമൂതിരി പരാജയപ്പെട്ടു. നഷ്ടപ്പെട്ട രാജ്യത്തിന്റെ ഭാഗങ്ങൾ തിരിച്ചു കിട്ടിയ കൊച്ചി രാജാവിന് മാർത്താണ്ഡ വർമ്മയുടെ സേവനത്തിൽ മതിപ്പു തോന്നി. പുത്തൻചിറ ഗ്രാമം സമ്മാനമായി നൽകി. മാർത്താണ്ഡ വർമ്മയുടെ കുടുംബ സ്വത്തിനു മുതൽക്കൂട്ടാതെ ഗ്രാമം തിരുവിതാംകൂർ രാജാവിന് സമർപ്പിച്ചു. 

അന്ന് മുതൽ പുത്തൻചിറ ഗ്രാമം തിരുവിതാംകൂറിൽ കോട്ടയം ജില്ലയിൽ പറവൂർ താലൂക്കിലെ പ്രവൃത്തി അഥവ  അംശമായി നില കൊണ്ടു. തിരുക്കൊച്ചി സംയോജനത്തോടെ 1949  ജൂലൈ ഒന്നിന് തൃശൂർ ജില്ലാ രൂപവൽക്കരിക്കപ്പെട്ടപ്പോൾ മുകുന്ദപുരം താലൂക്കിലുമായി. എ.ഗില്ലറ്റി, എ.ജെ.വാൻ ടാർ ബർഗ്, പി.ഗ്രൂട്ട് എന്നിവർ ചേർന്ന് തയ്യാറാക്കിയ ഡച്ച് രേഖയിൽ പുത്തൻചിറയെ മനോഹരമായ നാട് എന്നാണു വിശേഷിപ്പിച്ചിട്ടുള്ളത്. പുത്തൻചിറ ഇന്നും ഈ വിശേഷണത്തിന്റെ അഴക് അറിയിക്കുന്നു.