മാലോകരുടെ മനസുകളിൽ മറക്കാനാവാത്ത മഹിത മുദ്രിതനായി മാളയെ മാറോടണച്ച്  മോഹനോന്മുഖമാക്കി മരണത്തെ മണ്മറഞ്ഞ കൈരളിയുടെ ചലച്ചിത്ര താരമായിരുന്നു അരവിന്ദൻ.മലയാള സിനിമയിലെ അതുല്യ നടനായിരുന്ന മാള അരവിന്ദന്റെ വേർപാടിന് ഒമ്പത് വർഷം പിന്നിടുന്നു. അദ്ദേഹത്തിന്റെ വിയോഹം ചലച്ചിത്ര വേദിക്ക് കനത്ത നഷ്ടമായി. കണ്ണീരും കിനാവും സംഘർഷങ്ങളും ഉള്ള കഥാപാത്രങ്ങളെ അവതരിപ്പിച്ചു കൊണ്ട് മാള നടനായി ജീവിച്ചു. അഭിനയം മിസ് ഇന്ത്യയാണെങ്കിൽ സംഗീതം മിസ് വേൾഡാണെന്നായിരുന്നു അരവിന്ദൻ അഭിപ്രായപ്പെട്ടത്. അദ്ദേഹം ചലച്ചിത്ര രംഗത്ത് ചിരിയുടെ  ചെങ്കോലേന്തിയ ചിരസ്‌മരണീയനാണ്.

       കലയിലും ജീവിതമായിരുന്നു കൈപ്പുസ്തകം      

അരങ്ങിലും അഭ്രപാളിയിലുമായി അരവിന്ദന്റെ അഭിനയ മികവിന് അഞ്ച് പതിറ്റാണ്ട് പഴക്കമുണ്ട്. അനേകം നാടകങ്ങൾക്ക് പുറമെ നാനൂറോളം സിനിമകളിൽ അദ്ദേഹം വേഷമിട്ടു. അഭിനേതാവെന്ന നിലയിൽ ആർജ്ജവവും ആത്മസത്തയും പ്രോജ്വലമാക്കി പ്രേക്ഷക മനസ്സിൽ ഒരു സിംഹാസനം തന്നെ സ്വായത്തമാക്കാൻ ഇദ്ദേഹത്തിന് കഴിഞ്ഞു. മനസ്സുനിറഞ്ഞു ചിരിക്കാനുള്ള സൗഭാഗ്യമാണ് മലയാള സിനിമക്ക് ഈ നടൻ നൽകിയത്. 

മാള  അരവിന്ദൻ ആരുടേയും വേഷം തട്ടിയെടുത്തില്ല. കിട്ടിയത് കൊണ്ട് സന്തോഷിച്ചു. മറ്റുള്ളവരെ സന്തോഷിപ്പിക്കുകയും ചെയ്തു. തബലിസ്റ്റ് ആയതു കൊണ്ടായിരിക്കണം അദ്ദേഹത്തിന് നല്ല താളബോധമുണ്ടാക്കിയത്. ഹാസ്യാഭിനയത്തിൽ തന്റേതായ  ഒരു ശൈലി രൂപപ്പെടുത്തിയ  അരവിന്ദൻ സംഭാഷണങ്ങളിലും സവിശേഷത കാത്ത് സൂക്ഷിച്ചു. പ്രത്യേക രീതിയിലുള്ള ശബ്ദ വിന്യാസവും ഓട്ടവും ചാട്ടവും  ചീറ്റലുമെല്ലാം മാളക്ക്  മാത്രം  സ്വന്തമായി.  കുറുക്കിയുള്ള സംഭാഷണമായിരുന്നു സിനിമയിൽ മാളയുടെ ജീവിതം. ആ സംഭാഷണത്തെ പിൻ തുടർന്ന് വക്രീകരിച്ച ഒരു ചിരിയിൽ  മലയാള സിനിമ ഒരുപാട് കാലം ജീവിച്ചു.

പക്ഷെ മാളയെ മനുഷ്യനായും നടനായും പരിഭാഷപ്പെടുത്തിയത് ജീവിതത്തിൽ നിന്നും കണ്ടെടുത്ത അനുഭവങ്ങളായിരുന്നു. കലയിലും ജീവിതമായിരുന്നു കൈപ്പുസ്തകം, മലയാള 

 ചലച്ചിത്ര വേദിയിൽ നാല് തലമുറയോടൊപ്പം അഭിനയിച്ചിട്ടുള്ള മാള അരവിന്ദന്റെ ഏറ്റവും വലിയ ആഗ്രഹം തന്റെ മനസിലുണ്ടായിരുന്ന കഥ സംവിധാനം ചെയ്യണമെന്നായിരുന്നു. നൂൽപ്പാലം എന്ന ചിത്രത്തിലാണ് ഏറ്റവും അവസാനം അഭിനയിച്ചത്. 

എറണാകുളം ജില്ലയിലെ വടവുകാട് സ്വദേശിയായ അരവിന്ദൻ മാളയിൽ എത്തിയത് സംഗീത അദ്ധ്യാപികയായ അമ്മ പൊന്നമ്മയുടെ ജോലിയുമായി ബന്ധപ്പെട്ടായിരുന്നു . പിൽക്കാലത്ത് മാള എന്ന പ്രദേശത്തെ മലയാളി അറിഞ്ഞിരുന്നത് അരവിന്ദനിലൂടെ ആയിരുന്നു. മാള അരവിന്ദൻ നടനാകുന്നതിനു മുൻപ് തബല വായനക്കാരനായിരുന്നു. അമ്മയുടെ പ്രോത്സാഹനം   സംഗീതത്തിൽ താല്പര്യം ഉളവാക്കി. 

മാള സെന്റ് ആന്റണീസ് ഹൈസ്‌കൂളിൽ പഠിക്കുമ്പോൾ കല മത്സരങ്ങളിൽ ഒട്ടേറെ സമ്മാനങ്ങളും സർട്ടിഫിക്കറ്റുകളും നേടി. മുഹമ്മദ് ഉസ്താദ് ആയിരുന്നു തബലയിൽ അരവിന്ദന്റെ ഗുരുനാഥൻ. ഇരിങ്ങാലക്കുട ക്രൈസ്റ്റ് കോളേജിലായിരുന്നു പ്രീഡിഗ്രി പഠനം. ഇക്കാലത്ത് തന്നെ നാട്ടിൻ പുറത്തെ കലാസമിതികളിൽ  സജീവമായി. അന്നമനട കലാസമിതി അരവിന്ദന്റെ താവളമായി. അമച്വർ നാടകത്തിന്റെ പിന്നണിയിൽ തബല വായിച്ചു കിട്ടുന്ന  തുച്ഛമായ തുക കൊണ്ട് ജീവിതം മുന്നോട്ട്  നീക്കി. 

അരവിന്ദനും അന്നയും 1971 ഫെബ്രുവരി 1 ന് വിവാഹിതരായി. കാട്ടൂർ ബാലന്റെ താളവട്ടം എന്ന നാടകത്തിലൂടെ അഭിനയ രംഗത്തേക്ക്  പ്രവേശിച്ചു. പിന്നീട് പ്രൊഫഷണൽ നാടകങ്ങളിൽ നിറഞ്ഞു നിന്നു. കോട്ടയം നാഷണൽ തിയേറ്റേഴ്‌സിന്റെ സെക്കന്റ് ബെൽ, യാത്ര, പെരുമ്പാവൂർ നാടക ശാലയുടെ മനസ്, രംഗം, സ്വരം, രസന, സമാന്തരം എന്നീ നാടകങ്ങളിലൂടെ അരവിന്ദൻ ശ്രദ്ധേയനായി. എസ്.പി.പിള്ള, കുതിരവട്ടം പപ്പു, നെല്ലിക്കോട് ഭാസ്കരൻ, കുട്ടിയേടത്തി വിലാസിനി, ബാബു നമ്പൂതിരി, തിലകൻ തുടങ്ങിയവരോടൊപ്പം നാടകങ്ങളിൽ  അഭിനയിച്ചു.  

ഇതിനിടയിൽ തളിരുകൾ എന്ന സിനിമയിൽ നാഗേഷിനോടൊപ്പം ഒരു ചെറിയ വേഷം ചെയ്തു. പക്ഷെ ചിത്രം പുറത്ത് വന്നില്ല. ടാസ്, വികാസ്, തരംഗം, ഷിപ്പ്‌യാർഡ്,ആക്ട്, സ്പാർക്ക് അവാർഡുകൾ അരവിന്ദന് ലഭിച്ചു . സിന്ദൂരം സിനിമയിൽ 1978 ൽ വേഷമിട്ടു. പിന്നെയും നാടകവുമായി കുറച്ച് കാലം കഴിച്ചു കൂട്ടി. എസ് എൻ പുരം സൂര്യസോമയുടെ നിധിയിൽ  ദാമോദരൻ നമ്പ്യാരെ അവതരിപ്പിച്ച അരവിന്ദന് 1978 ലെസംസ്‌ഥാന സർക്കാരിന്റെ മികച്ച നടനുള്ള അവാർഡും  ലഭിച്ചു. 

പി.ജി.വിശ്വംബരന്റെ മധുരിക്കുന്ന രാത്രിയിൽ കോൺസ്റ്റബിൾ കുട്ടൻ പിള്ളയായി അരവിന്ദൻ അഭിനയിച്ചു. പിന്നെ അരവിന്ദനെ തേടി നിരവധി അവസരങ്ങൾ എത്തി.

ഇവളൊരു നാടോടി, ആളൊരുങ്ങി അരങ്ങൊരുങ്ങി, ആവേശം, അധികാരം, തടവറ, ഇന്നലെയുടെ ബാക്കി, താറാവ്, കോട്ടയം കുഞ്ഞച്ചൻ, മഹായാനം, കാർണിവൽ, ഉത്സവ പിറ്റേന്ന്, കേളി,പട്ടാളം, രസികൻ,  മീശശമാധവൻ തുടങ്ങി ഒട്ടേറെ സിനിമകളിൽ തിളങ്ങി നിന്നു. അമ്പിളിയുടെ കമ്പനിയിൽ 110  വയസുള്ള ആദിവാസി മൂപ്പനെ അരവിന്ദൻ അപൂർവ്വമായി ആവിഷ്കരിച്ചു. ഹാസ്യാഭിനയത്തിനാണ് മുൻ തൂക്കമെങ്കിലും ചുരുക്കം ചില സിനിമകളിൽ ഗൗരവമുള്ള വേഷങ്ങളും മാള അരവിന്ദൻ കൈകാര്യം ചെയ്തു.

 

താറാവിലെ തങ്കി, സമ്മാനത്തിലെ ആനക്കാരൻ, വെങ്കലത്തിലെ മൂശാരി, സല്ലാപത്തിലെ മൂത്താശ്ശാരി, കന്മദത്തിലെ സ്വാമി, ഭൂതക്കണ്ണാടിയിലെ കുരുടൻ, കരുമാടിക്കുട്ടനിലെ ചേന്ദൻ, കട്ട് ചെമ്പകത്തിലെ കേളു മൂപ്പൻ, കണ്ണുനീരിന്റെ മധുരത്തിലെ വെളിച്ചപ്പാട്, താപ്പാനയിലെ ആനപ്പാപ്പാൻ എന്നിങ്ങനെ വെള്ളിത്തിരയിൽ അരവിന്ദന്റെ സർഗാത്മക ചൈതന്യം നിറഞ്ഞൊഴുകുന്ന കഥാപാത്രങ്ങൾ ആരാധകർക്കിടയിലെ നേർ സാക്ഷ്യങ്ങളാണ്. 

അക്കാലത്ത് ഹാസ്യ നടന്മാരായിരുന്ന മൂന്നു പ്രശസ്തരെ മുൻ നിർത്തി പപ്പു മാള ജഗതി എന്ന സിനിമയും പുറത്തിറങ്ങി. ചലച്ചിത്ര രംഗത്തെ മികച്ച സഹനടനുള്ള സംസ്‌ഥാന സർക്കാരിന്റെയും കേരള സർവ്വകലാശാലയുടെയും ഫിലിം ക്രിട്ടിക്‌സിന്റെയും അവാർഡുകൾ, ഇന്ദിരാഗാന്ധി സ്‌മാരക പുരസ്‌കാരം എന്നിവ അരവിന്ദന് ലഭിച്ചു. 

സിനിമ  രംഗത്ത് ജേസിക്കായിരുന്നു അരവിന്ദന്റെ ഗുരുസ്ഥാനം. മാളയിൽ കുടുംബത്തോടൊപ്പം കഴിഞ്ഞ ആനന്ദം മറ്റൊരിടത്തും ലഭിക്കില്ലെന്ന് മാള അരവിന്ദൻ പറഞ്ഞിരുന്നു. ഒരു മാള ടച്ചുള്ള സിനിമക്കായി പ്രേക്ഷകരും കാത്തിരുന്നു. പക്ഷെ മലയാള സിനിമയുടെ  ആ മഹാനുഭാവൻ 2015 ജനുവരി 28 ന് ജീവിതത്തോട് വിട പറഞ്ഞു.