കേരളത്തിന്റെ സാമൂഹിക ജീവിതത്തിൽ കൊടുങ്കാറ്റു സൃഷ്ടിച്ച മഹാനായ അയ്യൻകാളിയുടെ ജന്മ വാർഷികം ആണ് ചിങ്ങമാസത്തിലെ അവിട്ടം. മനുഷ്യന്റെ സാധാരണ അവകാശങ്ങൾ പോലും പൂർണ്ണമായി നിഷേധിക്കപ്പെട്ട ഒരു കൂട്ടം ജനതയുടെ വിമോചനവും പുരോഗതിയുമായിരുന്നു അയ്യൻകാളിയുടെ ലക്ഷ്യം.  

വിപ്ലവമെന്ന വാക്കിന്റെ നേർപൊരുൾ  എന്തെന്നു  മനസ്സിലാക്കിയ അപൂർവ്വ വ്യക്തികളിലൊരാളാണ്  അയ്യൻകാളി. അയ്യൻകാളിയുടെ ജീവിതം തീക്കനൽപ്പുറത്ത് കൂടെയുള്ള യാത്രയായിരുന്നു.  അദ്ദേഹത്തിന്റെ തീവ്ര സമരങ്ങൾ ഇവിടത്തെ ജനതയ്ക്കു വേണ്ടി മാത്രമായിരുന്നു.  മടുത്തു മാറാത്ത മനസ്സും തളർന്നുറങ്ങാത്ത മേധാ ശക്തിയുമുണ്ടെങ്കിൽ ഏതു ദുരാചാര മതിലുകളും പൊളിച്ചു നീക്കാമെന്ന് ആ മഹാൻ തെളിയിച്ചു.  അയ്യൻകാളിയെ സമുദായ പരിഷ്‌കർത്താക്കളുടെ മുന്നണിയിലാണ് ചരിത്രം നിറുത്തിയിരിക്കുന്നത്.  മരണത്തിനു ശേഷം വിശ്രമം എന്നു പറഞ്ഞ് രാവും പകലും അവിശ്രമം  കർമ്മകാണ്ഡത്തിൽ മുഴുകിയ അയ്യൻകാളി ചരിത്രത്തിന്റെ അവിസ്മരണീയ ചിത്രമായി എന്നും നിലകൊള്ളും.  അയ്യൻകാളി മലയാളക്കരയുടെ ഇരുണ്ട യുഗത്തിന് അന്ത്യംകുറിച്ച പ്രക്ഷോഭകാരിയായിരുന്നു. 

തിരുവനന്തപുരം ജില്ലയിലെ വെങ്ങാന്നൂരിൽ പുലയ സമുദായത്തിൽപ്പെട്ട പെരുങ്കാട്ട് വിളപ്ലാവന്തര അയ്യന്റെയും മാലയുടെയും മകനായി 1863 ഓഗസ്റ്റ് 28 നാണ് അയ്യൻകാളി ജനിച്ചത്.  ബാല്യകാലത്തെ അനുഭവങ്ങളും ജാതീയമായി അടിച്ചേൽപ്പിക്കപ്പെട്ട അവശതയും  അയ്യങ്കാളിയെ വേറിട്ട ഒരു ബാലനാക്കി.  സ്വന്തം അനുഭവത്തിൽ നിന്നും ലഭിച്ച പാഠങ്ങൾ അവൻ തന്റെ കൂട്ടുകാർക്കു പറഞ്ഞു കൊടുത്തു.  ഒരു സാഹോദര്യം അങ്ങനെ വളർന്നു വന്നു.  സവർണ സമൂഹം 'ധിക്കാരി' എന്നും 'നിഷേധി' എന്നും കാളിയെ മുദ്ര കുത്തി.  സ്വസമുദായമാകട്ടെ കാളിയെ 'മൂത്തപിള്ള' എന്നും 'ഊർപിള്ള' എന്നും സംബോധന ചെയ്തു.  

അക്കാലത്ത് കാളിയും സംഘവും 'ശ്രീഹരിശ്ചന്ദ്ര' എന്ന നാടകം അവതരിപ്പിച്ചു.  അയിത്തവും തീണ്ടലും മാറണമെങ്കിൽ ആദ്യം പുരോഗതി പ്രാപിക്കേണ്ടത് സ്വസമുദായമാണെന്ന തിരിച്ചറിവ് കാളിക്കുണ്ടായി. എല്ലാം വിധിയാണെന്ന് കരുതി കഴിയുന്ന ഒരു ജനതയെ ഉദ്ധരിക്കാൻ ആവശ്യം വേണ്ടത് ബോധവൽക്കരണമാണെന്നും കാളി ഉറച്ചു.  അതുകൊണ്ടാണ് 'ഹരിശ്ചന്ദ്ര' എന്ന നാടകം അവതരിപ്പിക്കാൻ കാളി മുതിർന്നത്.  തമിഴും മലയാളവും കലർന്ന ഒരു സങ്കര ഭാഷയാണ് ഇതിനുപയോഗിച്ചത്.  സാമുദായിക പ്രവർത്തനങ്ങൾക്ക് നാടുനീളേ നടന്നപ്പോൾ ഈ നാടക സംഘവും കാളിക്ക് പിന്തുണയായി ഉണ്ടായിരുന്നു.  സവർണരിൽ നിന്ന്  എതിർപ്പുണ്ടായാൽ തിരിച്ചടിക്കാൻ പ്രാപ്തിയുള്ള ഒരു സംഘത്തെ വാർത്തെടുക്കണമെന്ന് കാളി തീരുമാനിച്ചു. അടി, തട, ഗുസ്തി, മർമവിദ്യ എന്നിവ രഹസ്യമായി പഠിക്കുവാൻ സംഘം തീരുമാനിച്ചു.  'അയ്യങ്കാളിപ്പട' എന്ന് പിൽക്കാലത്ത് പ്രശസ്തമായ പടയെ ഇങ്ങനെയാണ് കാളി രൂപപ്പെടുത്തിയത്.  സവർണർ ഈ സംഭവം ചർച്ച ചെയ്തു. അയ്യൻകാളിയുടെ സംഘത്തിൽ ഉള്ളവരെല്ലാം ബലിഷ്‌ഠരാണെന്നും എതിർത്താൽ അപമാനം സഹിക്കേണ്ടി വരുമെന്നും സവർണ്ണർ മനസ്സിലാക്കി. പല സ്ഥലത്തു നിന്നും പ്രതിഷേധം ഉയർന്നു.  ചാരം മൂടിയ തീക്കനലായി സവർണരിൽ ആ സംഭവം കിടന്നു. 

അരുവിപ്പുറത്ത് അയ്യൻകാളി 1888-ൽ ശ്രീനാരായണ ഗുരുവിനെ സന്ദർശിച്ചു.  ഗുരുദേവന് അയ്യൻകാളിയിലെ നവോത്ഥാന നായകനെ കണ്ടെത്താൻ കഴിഞ്ഞു.  അധ:സ്ഥിതവർഗങ്ങളുടെ എന്ത് പ്രശ്‍നം ഉണ്ടായാലും അയ്യങ്കാളി അവിടെ ഓടിയെത്തും. അവരുടെ സുഖത്തിലും ദുഖത്തിലും അദ്ദേഹം പങ്കു കൊള്ളും. ഏറ്റവും പ്രാഥമികമായി വഴി നടക്കാനുള്ള അവകാശം നേടിയെടുക്കുവാൻ തന്റെ അനുയായികളെ വിളിച്ചു കൂട്ടി അദ്ദേഹം തീരുമാനമെടുത്തു.  നാവോത്ഥാന നായകനെ കണ്ടെത്താൻ കഴിഞ്ഞു. അതനുസരിച്ച്  അവർ  ഒരു ദിവസം ആറാംലംമൂട് ചന്തയിലേക്ക് കാൽ നട  ആരംഭിച്ചു. ബാലരാമപുരം ചാലിയത്തെരുവിൽ അവർ തടയപ്പെട്ടു. ആ എതിർപ്പ് ഒരു വലിയ ലഹളയ്ക്ക് കാരണമായി.  ഇരുപക്ഷക്കാർക്കും കാര്യമായ മർദ്ദനമേറ്റു.  

ആദ്യത്തെ ഈ സായുധ സമരം രക്തച്ചൊരിച്ചിലിനിടയാക്കി. ചാലിയത്തെ തെരുവു ലഹളയുടെ വിവരം കാട്ടു തീ പോലെ പടർന്നു.  സഞ്ചാര സ്വാതന്ത്ര്യത്തിനു വേണ്ടി എല്ലാ മുക്കിലും മൂലയിലും പ്രക്ഷോഭങ്ങൾ ആരംഭിച്ചു.  അധ: സ്ഥിതവർഗങ്ങളുടെ ജന്മാവകാശങ്ങൾക്കു വേണ്ടി ധീരമായി വാദിക്കുകയും പ്രത്യക്ഷ സമരങ്ങൾക്ക് നേരിട്ട് നേതൃത്വം നൽകുകയും ചെയ്തതോടെ അയ്യൻകാളി നാടൊട്ടുക്കും അറിയപ്പെടുന്ന വ്യക്തിയായി തീർന്നു.  അക്കാലത്ത് അയിത്ത ജാതിക്കാർക്ക്  സ്‌കൂൾ പ്രവേശനം അനുവദിക്കപ്പെടാതിരുന്നതുകൊണ്ട് അനന്തര തലമുറക്കെങ്കിലും അതുണ്ടാകണമെന്നു കരുതി വിദ്യാഭ്യാസ സൗകര്യം നേടുന്നതിന് അദ്ദേഹം പ്രവർത്തനം ആരംഭിച്ചു.  

കേരളത്തിൽ ആദ്യമായി അയിത്ത വരഗ്ഗക്കാരുടെ വകയായി വെങ്ങാനൂരിൽ 1904 ൽ ഒരു കുടിപ്പള്ളിക്കൂടം സ്ഥാപിതമായി. എന്നാൽ അധികം താമസിയാതെ ആ സ്ഥാപനം നശിപ്പിക്കപ്പെട്ടു. മതം എന്തായാലും തന്റെ ജനത ഒന്നായി കഴിയണമെന്ന് അയ്യൻകാളി ആഗ്രഹിച്ചു. എന്നാൽ മതപരിവർത്തനത്തെ അദ്ദേഹം എതിർത്തു. 

അയ്യൻ‌കാളി ഒരു ഭീമഹർജി തയാറാക്കി തിരുവിതാംകൂർ മഹാരാജാവിന് സമർപ്പിച്ചു.  തന്നെ മതപരിവർത്തനത്തിനു നിർബന്ധിക്കുന്നുവെന്നും  മതപരിവർത്തനം കാരണം തൻ്റെ ജനതയുടെ സംഖ്യ കുറഞ്ഞുവരുന്നുവെന്നും ആരെയും നിർബന്ധിച്ചു മതം മാറ്റാൻ പാടില്ലെന്ന് വിക്ടോറിയാ മഹാരാഞ്ജിയുടെ  കൽപ്പന ഉണ്ടെന്നും അയ്യങ്കാളി ഹർജിയിൽ പറഞ്ഞു.  

അയ്യങ്കാളിയെയും കൂട്ടരെയും വിളിച്ചു കൂട്ടി അവരെചേർത്ത് സദാനന്ദ സ്വാമി ഒരു സഭയുണ്ടാക്കി.  അങ്ങനെ പാച്ചല്ലൂർ കേന്ദ്രമാക്കി 'ബ്രഹ്മനിഷ്ഠാമഠം സംഘ' ത്തിന്റെ ഒരു ചിൽസഭ അയ്യങ്കാളിയുടെ നേതൃത്വത്തിൽ പ്രവർത്തനം ആരംഭിച്ചു. ചിൽസഭ ആത്മീയ കാര്യങ്ങളിൽ മാത്രം ഒതുങ്ങി നിന്നു.  അത് സാമൂഹികമോ, സാമ്പത്തികമോ, ആയ കാര്യങ്ങളിൽ ഇടപെടുന്നില്ലെന്നു കണ്ടപ്പോൾ അയ്യങ്കാളിയും കൂട്ടരും അതിൽ നിന്നും വിട്ടു പോയി. അയിത്താചാര വിരുദ്ധ പ്രസ്ഥാനം തുടങ്ങി വച്ച വി. ജെ. തോമസ് വാധ്യാരും, ഹാരീസ് വാധ്യാരും അയ്യങ്കാളിയും ചേർന്ന് 1907-ൽ തീണ്ടലിനും ഇതര സാമൂഹിക അവശതകൾക്കും വിധേയരായ എല്ലാ ജാതിവിഭാഗക്കാരെയും ചേർത്ത് 'സാധുജനപരിപാലന സംഘം' രൂപീകരിച്ചു. അയ്യങ്കാളി സംഘടനയുടെ നേതാവായി തെരഞ്ഞെടുക്കപ്പെട്ടു. സാധുജനപരിപാലന സംഘത്തിന് 24 വകുപ്പുകൾ അടങ്ങിയ ഒരു നിയമാവലി എഴുതി തയാറാക്കി. അയിത്തജാതിക്കാർക്കു സ്‌കൂൾ പ്രവേശനം അനുവദിച്ചു കൊണ്ട് 1907-ൽ ഗവണ്മെന്റ് തീരുമാനമുണ്ടായി.  എന്നാൽ ഈ നിയമം നടപ്പാക്കുവാൻ ഗവൺമെന്റുദ്യോഗസ്ഥരും സ്‌കൂൾ മാനേജർമാരും കൂട്ടാക്കിയില്ല.  സ്‌കൂൾ പ്രവേശനം സർവത്ര നിഷേധിക്കപ്പെട്ടതോടെ അയ്യങ്കാളിയുടെ നേതൃത്വത്തിൽ അടിയാളർ കൃഷിപ്പണിക്കു പോകാതെയായി. 

 

സമാന്തരമായി അവർ കൂലി വർധനയും ജോലിസ്ഥിരതയും ആവശ്യപ്പെട്ടു. വിവിധ

പ്രദേശങ്ങളിലെ തൊഴിലാളികൾ ഒന്നടങ്കം സമരത്തിൽ പങ്കെടുത്തു. ജന്മിമാരും അടിയാളരും തമ്മിൽ നിരവധി സംഘട്ടനങ്ങൾ നടന്നു.